Ulttyq qorǵanys ýnıversıtetinde halyqaralyq gýmanıtarlyq quqyq boıynsha jańa pán engiziledi
ASTANA. KAZINFORM – Qorǵanys vedomstvosynyń basshysy avıatsııa general-leıtenanty Dáýren Qosanov Halyqaralyq Qyzyl Krest Komıtetiniń prezıdenti Mırıana Spolıarıchpen kezdesý ótkizdi. Bul týraly Qorǵanys mınıstrligi habarlady.
Basqosý barysynda taraptar Qazaqstan Qorǵanys mınıstrligi men Halyqaralyq Qyzyl Krest Komıteti arasyndaǵy halyqaralyq gýmanıtarlyq quqyq normalaryn ilgeriletýge jáne áskerı daıyndyq júıesinde bilim berý baǵdarlamalaryn damytýǵa baǵyttalǵan yntymaqtastyqtyń qazirgi jaı-kúıi men keleshegin talqylady.
Qorǵanys vedomstvosynyń basshysy Halyqaralyq Qyzyl Krest Komıtetimen ózara is-qımyldyń júıeli sıpatqa ıe ekenin atap ótti. Uıym sarapshylary bitimgerlik kontıngentterdi, áskerı-medıtsınalyq jáne ınjenerlik mamandardy daıarlaýǵa, sondaı-aq Qorǵanys mınıstrliginiń oqý ortalyqtary bazasynda BUU-nyń sertıfıkattalǵan kýrstaryn ótkizýge qatysady.
Ulttyq qorǵanys ýnıversıtetinde uıym mamandarynyń qatysýymen halyqaralyq gýmanıtarlyq quqyq boıynsha jeke oqý páni júrgiziledi. Taraptar áskerı qyzmetshilerdi daıarlaý, tájirıbe almasý jáne qarýly qaqtyǵystar quqyǵynyń halyqaralyq standarttaryn ilgeriletý salasyndaǵy ózara is-qımyldy odan ári damytý mańyzdy ekenin atap ótti.
Kezdesý qorytyndysy boıynsha taraptar áriptestikti odan ári nyǵaıtýǵa jáne praktıkalyq ózara is-qımyldy keńeıtýge múddeli ekenin jetkizdi.
Eske sala keteıik, buǵan deıin Qorǵanys mınıstrligi áskerge shaqyrý tártibi men oǵan qatysty zańsyzdyqtar týraly eskertkenin jazǵan edik.
