Ulttyq qorǵanys ýnıversıteti 1,9 mlrd teńgelik 22 jobany júzege asyrdy
ASTANA. KAZINFORM – Ǵylym qyzmetkerleri kúnine oraı Ulttyq qorǵanys ýnıversıtetinde merekelik is-shara ótti. Oǵan oqý ornynyń basshylyǵy, professorlyq-oqytýshylar quramy jáne ardagerler qatysty. Bul týraly Qorǵanys mınıstrligi habarlady.
Ǵylym men bilimdi damytý arqyly ulttyq qaýipsizdikti qamtamasyz etýge eleýli úles qosyp otyrǵan oqý orny úshin bul kúnniń mańyzy erekshe. Ýnıversıtet ujymy bul baǵytta júıeli jumys júrgizip, ǵylymı-zertteý jáne ınnovatsııalyq qyzmetti damytyp keledi. Zamanaýı ázirlemeler engizip, bilikti mamandar daıarlaýdy qamtamasyz etýde. Oqý ornynyń ǵylymı áleýetin 5 ǵylym doktory, 24 ǵylym kandıdaty, 57 fılosofııa doktory (PhD), 1 beıin boıynsha doktor quraıdy.
2018-2025 jyldary granttyq jáne baǵdarlamalyq-nysanaly qarjylandyrý aıasynda olar jalpy quny 1,9 mlrd teńgeni quraıtyn 22 ǵylymı-tehnıkalyq jobany júzege asyrdy. Onyń ishinde avtorlyq baǵdarlamalyq qamtamasyz etýi bar «Shaǵala» barlaý ushqyshsyz ushý apparaty, ınjenerlik áskerlerdiń qarýyna qabyldanǵan jańǵyrtylǵan mınasyzdandyrý qondyrǵysy jáne basqa da jobalar bar. Sondaı-aq barlaý-soqqy berý jáne barlaý-oq atý keshenderin qurý boıynsha zertteýler júrgizilip, olardy qoldaný jóninde usynymdar ázirlendi.
Sala mamandaryn merekemen ýnıversıtet bastyǵy general-maıor Baýyrjan Ábjanov quttyqtady. Ol ǵylymnyń memleketti damytýdaǵy jáne ulttyq qaýipsizdikti nyǵaıtýdaǵy strategııalyq róline toqtalyp, qazirgi geosaıası jaǵdaıda ǵylym men tájirıbeniń tyǵyz baılanysy erekshe mańyzǵa ıe ekenin atap ótti.
– Ǵylym – memleketti damytýdyń negizgi qozǵaýshy kúshi. Al áskerı ǵylym – el qaýipsizdiginiń senimdi qalqany. Sizderdiń tabandy eńbekterińiz ben ǵylymı izdenisterińizdiń arqasynda otandyq áskerı ǵylym jańa deńgeıge kóterilýde. Bul – úlken jetistik ári joǵary jaýapkershilik, - dep atap ótti general-maıor B. Ábjanov.
Іs-sharada áskerı bilim men ǵylymdy damytýǵa eleýli úles qosqan birqatar áskerı qyzmetshiler men ǵalymdar alǵys hattarmen marapattaldy.
Ǵylym qaıratkerleriniń qurmetine Ulttyq áskerı-patrıottyq ortalyqtyń Ortalyq ansambliniń ártisteri men «Kúmbir» trıosy óner kórsetti. Ulttyq naqyshtaǵy jáne patrıottyq kompozıtsııalar kórermenderdiń ystyq yqylasyna bólendi.
Eske sala keteıik, buǵan deıin Aqtóbede oqýshylarǵa arnalǵan áskerı ınstıtýt bazasyndaǵy qosymsha sabaqtar bastalǵanyn jazǵan edik.
