Ulttyq qorǵa tikeleı salyq aýdaratyn munaı uıymdarynyń sany 8,5 ese qysqaryp ketken
ASTANA. KAZINFORM — Joǵary aýdıtorlyq palata júrgizgen aýdıt 2024 jyly Ulttyq qorǵa tikeleı salyq aýdaratyn munaı uıymdarynyń sany 8,5 ese qysqaryp ketkenin anyqtaǵan. Palata múshesi Nurlan Nurjanov Májilistegi otyrysta osyndaı derek keltirdi.
— Ulttyq qordyń aktıvteri 2024 jyldyń qorytyndysy boıynsha JІÓ-niń 20 paıyzyn ǵana qurady. Bul — sońǵy 15 jyldaǵy eń tómengi kórsetkish. Jalpy Ulttyq qordyń qarajaty sońǵy 10 jylda respýblıkalyq bıýdjettiń orta eseppen 30 paıyzyn, onyń ishinde 2024 jyly 23 paıyzyn qamtamasyz etti. Ulttyq qorǵa 2024 jyly túsken salyq 3,8 trln teńge bolsa, respýblıkalyq bıýdjetke alynǵan transfertter kólemi 5,6 trln teńge boldy. 40 paıyz ósken, — dedi ol.
Alaıda, qor aktıvterin basqarýdan túsken kiris 5 trln teńge bolyp, jalpy oń balansqa áser etken.
— Ulttyq qorǵa 2024 jyly túsken tikeleı salyq 2023 jylmen salystyrǵanda 16 paıyz tómendegen. Ulttyq qorǵa tikeleı salyq tóleıtin munaı uıymdarynyń 2024 jylǵa arnalǵan tizbesi 8,5 ese qysqaryp, 166 mlrd teńge túspeı qalǵan. Osynyń saldarynan Ulttyq qordyń aktıvterin 2030 jylǵa deıin 100 mlrd dollarǵa jetkizý týraly maqsattyń oryndalmaýyna eleýli táýekelder týyndap otyr, — dedi palata múshesi.
Sondaı-aq, ol Úkimet byltyr bıýdjettiń shyǵys bóligin 13 ret ózgertkenin atap ótti.