Ulttyq qordyń valıýtalyq aktıvteri $65,5 mlrd-qa jetti
ASTANA. KAZINFORM – Qazaqstan Ulttyq qorynyń valıýtalyq aktıvteri 2026 jylǵy 1 shildedegi jaǵdaı boıynsha 65,5 mlrd dollardy qurady. Bul kórsetkish ekinshi toqsanda 3,1 mlrd dollarǵa ósti, dep habarlaıdy Kazinform Qazaqstan Ulttyq bankine silteme jasap.
Qazaqstan Ulttyq bankiniń basqarmasy 2026 jyldyń ekinshi toqsanyndaǵy Ulttyq qor aktıvterin senimgerlik basqarý nátıjeleri týraly esepti bekitti. Sondaı-aq aqsha jáne valıýta naryǵyndaǵy ahýal týraly baıandama tyńdaldy.
Esepti kezeńde Ulttyq qor aktıvteriniń kiristiligi 2,92 mlrd dollar boldy.
Ulttyq banktiń málimetinshe, qordyń ınvestıtsııalyq nátıjesine geosaıası shıelenistiń báseńdeýi, tehnologııalyq sektordyń ósýi jáne álemdik qor naryqtarynyń qalpyna kelýi áser etti. Buǵan qosa, jahandyq oblıgatsııalar naryǵy qalypty qarqynmen ósti. Al munaı men altyndy qosa alǵanda, shıkizat baǵasy tómendedi.
Ulttyq bank basqarmasy Qazaqstanda valıýtalyq operatsııalardy júzege asyrý qaǵıdalaryna ózgerister men tolyqtyrýlar engizdi. Jańa normalar zańdy tulǵalardyń qolma-qol emes shetel valıýtasyn satyp alý tártibin jetildirýge baǵyttalǵan.
Sonymen qatar Ulttyq bank basqarmasynyń birqatar qaýlysyna ózgerister engizildi. Bul qujattar Qazaqstan Respýblıkasynyń jańa Konstıtýtsııasyna, Tsıfrlyq kodekske jáne basqa da zańdarǵa sáıkestendirildi.
Buǵan deıin Premer-mınıstrdiń orynbasary – Ulttyq ekonomıka mınıstri Serik Jumanǵarın Úkimet otyrysynda Ulttyq qordyń valıýtalyq aktıvteri 2029 jyly 70,6 mlrd dollarǵa deıin ulǵaıatynyn aıtqan bolatyn.
Osyǵan deıin Qazaqstan Ulttyq banki otandyq reıtıng agenttiginiń quryltaıshysy bolatyny týraly jazdyq.
