Ulttyq qordyń aqshasy nege tym qarqyndy jumsalyp jatyr – Ulttyq bank jaýaby

ASTANA. KAZINFORM — Ulttyq bank tóraǵasy Tımýr Súleımenov Ulttyq qordan aqsha alýdyń qarqyny týraly pikir bildirdi.

— Jyldyń alǵashqy eki aıynda Ulttyq qordan bıýdjetke alynǵan transfert kólemi 1 trln teńgeden asyp ketti. Al bıylǵa alynatyn transferttiń jalpy kólemi 5,25 trln teńge bolyp belgilengen edi. Keıbir sarapshylar byltyrǵydaı Ulttyq qordan aqsha alýdyń qarqynyn arttyrady dep boljap jatyr. Byltyrǵydaı jaǵdaı qaıtalanbaı ma, — dep surady jýrnalıst Ulttyq bank uıymdastyrǵan baspasóz máslıhatynda.

Tımýr Súleımenov bul másele boıynsha Úkimetpen baılanysta jumys istep otyrǵandaryn aıtty. 

— Qazirgi qarqyn bizdi de oılandyryp otyr. Transfertter shekten tys tez ıgerilip, keıin jyldyń sońǵy onkúndiginde ishki naryqtaǵy shetel valıýtasynyń usynysy túgesilip qalmaýy kerek. Salyq máseleleriniń de belgili bir maýsymdyq sıpaty bar. Memlekettik kirister komıteti solaı túsindirdi. Qazir Ulttyq qordan aýdarylatyn transfertterdiń ornyn basatyn negizgi salyq túsimderi sáýir aıynda túse bastaıdy. Sondyqtan biz ony qadaǵalap otyramyz. Kvazımemlekettik sektor aktsııalaryna qatysty jaǵdaı qaıtalanbaıdy dep úmittenemin. Bizdiń ustanymymyz — bulaı qaıtalanbaý kerek. Ondaı josparymyz da, boljamymyz da joq. Biz bul máselede óte ustamdy ustanymda bolamyz, — dedi Ulttyq bank tóraǵasy.

Eske salsaq, 2024 jyly Ulttyq qorǵa 8,8 trln teńge kiris túsip, 5,6 trln teńge alynǵan.