Ulttyq qordy paıdalanýdyń jańa qaǵıdasy bekitildi

ASTANA. KAZINFORM — Úkimettiń 2 shildedegi qaýlysymen aktıvterdi Ulttyq qorǵa esepke jatqyzý, Ulttyq qordy paıdalaný qaǵıdalary, sondaı-aq Ulttyq qordy qalyptastyrý jáne paıdalaný týraly jyldyq eseptiń nysandary men ony jasaý qaǵıdalary bekitildi.

Ulttyq qor Bıýdjet kodeksinde belgilengen túsimderdiń esebinen qalyptastyrylady. Ulttyq bank Úkimetke Ulttyq qor qarajatyn esepke alý jáne ony jumsaý úshin teńgelik shot jáne shetel valıýtasynda túsetin qarajattyń teńgelik balamasyn esepke alý úshin teńgede tıisti shot ashady.

Munaı sektory uıymdaryna:

— shıki munaıdy, gaz kondensatyn óndirýmen aınalysatyn zańdy tulǵalar;

— shıki munaıdy, gaz kondensatyn barlaýǵa kelisimsharttar jasasqan zańdy tulǵalar;

— jer qoınaýyn paıdalanýshy salyqtyq mindettemeni zattaı nysanda oryndaý esebine bergen paıdaly qazbalardy memleket atynan alýshylar jatady.

Munaı sektory uıymdarynyń kelesi qarjy jylyna arnalǵan tizbesi aǵymdaǵy qarjy jylynyń jeltoqsanynda bıýdjetti atqarý jónindegi ortalyq ýákiletti organmen jáne jer qoınaýyn paıdalaný, munaı kelisimsharttaryn jasasý jáne oryndaý salasyndaǵy memlekettik saıasatty iske asyrýdy júzege asyratyn quzyretti organmen birlesip bekitiledi.

Memlekettik qazynashylyq aıdyń basyna deıin keminde bes jumys kúninen keshiktirmeı Ulttyq qorǵa jiberiletin jáne Úkimettiń Ulttyq bankte ashylǵan shottaryna aýdarylatyn túsimder somalarynyń aldaǵy aıǵa arnalǵan boljamyn Ulttyq bankke usynady.

Úkimettiń Ulttyq bankte ashylǵan teńgelik shotynda túsimderdiń jáne tólemder boıynsha qarjylandyrýdyń jıyntyq josparyna sáıkes Ulttyq qordan respýblıkalyq bıýdjetke beriletin kelesi aı saıynǵy kepildendirilgen transfertti aýdarý sheńberinde júzege asyrylatyn alyp qoıý úshin jetkilikti somada qarajat jınalǵannan keıin qarjy naryǵyndaǵy ahýalǵa qaraı qarajat Ulttyq qordyń Ulttyq bankte shetel valıýtasynda ashylǵan shotyna esepke jatqyzyla otyryp, teńgelik shottan aıyrbastalady.

Shetel valıýtasyndaǵy túsimderdi Ulttyq bank memlekettik qazynashylyqtyń korrespondenttik shottaryna shetel valıýtasynda esepke jatqyzady. Ulttyq qorǵa esepke jatqyzýǵa arnalǵan valıýtalar túrleri boıynsha shetel valıýtasyn qaıta aıyrbastaýdy memlekettik qazynashylyq Ulttyq bankten elektrondyq túrdegi tólem qujattary qosa berilgen shetel valıýtasyndaǵy shottar boıynsha úzindi kóshirmelerdi alǵan kúnnen bastap úsh jumys kúni ishinde júzege asyrady.

Shetel valıýtasy qaıta aıyrbastalǵannan keıin memlekettik qazynashylyq teńgemen alynǵan somany Ulttyq qordyń qolma-qol aqshany baqylaý shotyna esepke jatqyzady jáne sol jumys kúni bıýdjetti atqarý rásimine sáıkes shetel valıýtasynda túsetin qarajattyń teńgelik balamasyn esepke alý úshin Úkimettiń tıisti shotyna teńgemen aýdarady, Úkimettiń shottaryna esepke jatqyzylatyn sheteldik valıýtany dáıekti túrde qaıta aıyrbastaý jáne aıyrbastaý operatsııasy úshin Ulttyq bank belgilegen habarlamalar, ótinishter berý jáne somany teńgemen esepke jatqyzý kestesin saqtaıdy.

Ulttyq bank Ulttyq qordy basqarýdan túsetin ınvestıtsııalyq kiristerdi esepke alýdy kastodıandardan túsetin aqparattyń negizinde esepke jazý ádisimen júrgizedi. Investıtsııalyq kiristerdiń somasy Ulttyq qor kastodıanynyń shottarynda Ulttyq qor aktıvteriniń quramynda kórsetiledi.

Ulttyq qorǵa túsetin Qazaqstan Respýblıkasynyń zańnamasynda tyıym salynbaǵan ózge túsimder men kiristerdi zańdy jáne jeke tulǵalar Úkimettiń Ulttyq bankte ashylǵan shotyna aýdarady.

Ulttyq qor qarajatyn paıdalaný tártibi

Ulttyq qordyń qarajatyn paıdalaný Bıýdjet kodeksinde kózdelgen maqsattarǵa ǵana júzege asyrylady. Ulttyq qordyń qarajatyn jumsaý Ulttyq qordan respýblıkalyq bıýdjetke beriletin kepildendirilgen transfert túrinde, Prezıdent aıqyndaıtyn maqsattarǵa asa mańyzdy obektiler men jalpy eldik mańyzy bar jobalardy qarjylandyrýǵa Ulttyq qordan respýblıkalyq bıýdjetke beriletin nysanaly transfertter túrinde, nysanaly talaptardy tóleý jáne nysanaly jınaqtardy aýdarýǵa, esepke jatqyzý men tóleýge baılanysty banktik kórsetiletin qyzmetterge aqy tóleý boıynsha shyǵystardy jabý túrinde, sondaı-aq Ulttyq qordy basqarýǵa jáne jyl saıyn aýdıtti júrgizýge baılanysty shyǵystardy jabý túrinde júzege asyrylady.

Úkimettiń respýblıkalyq bıýdjet týraly zańdy iske asyrý týraly qaýlysynyń negizinde memlekettik qazynashylyq mindettemeler boıynsha qarjylandyrýdyń jıyntyq josparyn, túsimderdiń jáne tólemder boıynsha qarjylandyrýdyń jıyntyq josparyn jasaıdy jáne bekitedi, olarǵa sáıkes respýblıkalyq bıýdjetke Ulttyq qordan beriletin kepildendirilgen jáne nysanaly transfertterdi qarjy jyl ishinde tıisti kezeńge kózdelgennen aspaıtyn kólemde tartý júzege asyrylady.

Memlekettik qazynashylyq respýblıkalyq bıýdjet boıynsha túsimderdiń jáne tólemder boıynsha qarjylandyrýdyń jıyntyq jospary bekitilgen kúnnen bastap úsh jumys kúni ishinde Ulttyq qordan respýblıkalyq bıýdjetke beriletin kepildendirilgen transferttiń bekitilgen kólemin, Ulttyq qordan beriletin nysanaly transfertterdiń bekitilgen kólemin aılarǵa bóle otyryp, Ulttyq bankke jetkizedi jáne Ulttyq bank aýdarýdy júzege asyratyn derektemeler týraly habarlaıdy.

Memlekettik qazynashylyq respýblıkalyq bıýdjettiń Ulttyq qordan beriletin kepildik berilgen transfertke qajettilik kólemin aı saıyn boljaıdy.

Ulttyq qordan beriletin kepildendirilgen transfertke respýblıkalyq bıýdjet qajettiliginiń aldaǵy aıǵa arnalǵan kólemin boljaý respýblıkalyq bıýdjettiń qolma-qol aqshany baqylaý shotyndaǵy bıýdjet qarajatynyń qaldyǵy, respýblıkalyq bıýdjetke túsetin túsimderdiń kútiletin kóleminiń boljamdary men respýblıkalyq bıýdjet shyǵystarynyń aldaǵy aıda kútiletin atqarylýy jáne respýblıkalyq bıýdjettik baǵdarlamalardyń ákimshileri aı saıyn memlekettik qazynashylyqqa usynatyn aqparat eskerile otyryp aıqyndalady.

Ulttyq qordan kepildendirilgen jáne nysanaly transfertterdi bólýge arnalǵan ótinimdi bıýdjetti atqarý jónindegi ortalyq ýákiletti organ osy Qaǵıdalarǵa 3-qosymshaǵa sáıkes nysan boıynsha jasaıdy, oǵan bıýdjetti atqarý jónindegi ortalyq ýákiletti organnyń birinshi basshysy nemese ol ýákilettik bergen tulǵa qol qoıady jáne kelesi jumys kúninen keshiktirilmeı Ulttyq bankke jiberiledi.

Ulttyq qordan respýblıkalyq bıýdjetke beriletin kepildendirilgen transferttiń aqsha qajettiliginiń qajetti kólemin aýdarý aı saıyn Ulttyq bankke jiberiletin ótinimniń negizinde júzege asyrylady.

Ulttyq qordan respýblıkalyq bıýdjetke beriletin nysanaly transfertterdi aýdarý Ulttyq bankke jiberiletin ótinimniń negizinde júzege asyrylady.

Ulttyq bank bıýdjetti atqarý jónindegi ortalyq ýákiletti organnyń ótinimi negizinde ony alǵan kúnnen bastap on bes jumys kúni ishinde kepildik berilgen transferttiń málimdelgen somasyn, on bes jumys kúni ishinde Ulttyq qordan beriletin nysanaly transfertti respýblıkalyq bıýdjettiń qolma-qol aqshany baqylaý shotyna aýdarady.

Úkimet qaýlysy alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi. 

Aıta ketelik Ulttyq qordan bólingen qarajatty talan-tarajǵa salǵan pavlodarlyq sheneýnik sottalǵan edi.