Ulttyq qordy 100 mlrd dollarǵa jetkizý: jospar 2030 jyldan keıin iske asýy múmkin
ASTANA. KAZINFORM — Qazaqstan Ulttyq qorynyń aktıvteri 100 mlrd dollarlyq mejege 2030 jyldan keıin jetýi múmkin. Bul týraly Ulttyq ekonomıka birinshi vıtse-mınıstri Azamat Ámrın málim etti.
Aıta keteıik, 2030 jylǵa qaraı Ulttyq qordyń valıýtalyq aktıvterin 100 mlrd dollarǵa deıin jetkizý jospary qoıylǵan edi.
— Maqsat boıynsha 2030 jylǵa qaraı Ulttyq qor kqarajatyn 100 mlrd dollarǵa jetkizý belgilengen edi. Osy oraıda tıisti reformany júzege asyrdyq. 5 trln teńge kólemindegi qosymsha nysanaly transfert alynatynyna qaramastan, Ulttyq qorǵa túsetin qarajat kólemi artyp keledi, – dedi Azamat Ámrın Quryltaıda tilshiler suraǵyna jaýap bere otyryp.
Onyń aıtýynsha, qazirgi ýaqytta Ulttyq qor kólemi ulǵaıyp, 70,5 mlrd dollarǵa jetýi múmkin.
Sonymen qatar vıtse-mınıstr qor qarajaty bolashaq urpaqqa qalatyn áleýmettik ınfraqurylym nysandaryn qurýǵa múmkindik beretinin eske saldy.
— Munyń bári (salynatyn jańa nysandar) bolashaq urpaqqa arnalǵan. Sondyqtan, túptep kelgende, biz 100 mlrd dollarlyq mejege jetemiz. Degenmen 2030 jylǵa deıin bolmaýy múmkin, ıaǵnı sál keıinirek jetýi yqtımal. Biraq biz ol kórsetkishke qol jetkizemiz, – dedi A. Ámrın.
Buǵan deıin Ulttyq qordan strategııalyq jobalarǵa 5 trln teńge bólinetinin jazǵan edik.
