Ulttyq qordan strategııalyq jobalarǵa 5 trln teńge bólinedi – Qarjy mınıstrligi
ASTANA. KAZINFORM – 2027 jyly Qazaqstanda ekonomıkanyń damýyn yntalandyrý úshin 1,6 trln teńge jumsalmaq. Aldaǵy úsh jylda Ulttyq qor qarajaty esebinen 347 strategııalyq jobany iske asyrýǵa 5 trln teńge baǵyttaý josparlanyp otyr. Bul týraly Qarjy vıtse-mınıstri Abzal Beısenbekuly málim etti.
Vıtse-mınıstrdiń aıtýynsha, qarjylandyrý tásili birtindep qaıtarymsyz qarjylandyrýdan ınvestıtsııalyq nesıeleýge aýysyp jatyr. Bul bıýdjet qarajatyn tıimdi paıdalanýǵa jáne oǵan qosymsha jeke ınvestıtsııalar tartýǵa múmkindik beredi.
– Memlekettiń basty maqsaty – paıda tabý emes, halyq aldyndaǵy áleýmettik mindettemelerdi oryndaý jáne azamattardyń laıyqty ómir súrýine jaǵdaı jasaý. Barlyq bıýdjettik ınvestıtsııalyq jobalar basymdyqtaryna qaraı irikteldi, – dedi Abzal Beısenbekuly Quryltaıda ótken bıýdjet tanystyrylymynda.
Aldaǵy úsh jylda Ulttyq qor qarajaty esebinen 347 strategııalyq jobany iske asyrýǵa 5 trln teńge kózdelgen. Onyń 4,4 trln teńgesi tórt negizgi baǵytqa – kólik jáne logıstıkaǵa, áleýmettik salaǵa, energetıka men sý resýrstaryna baǵyttalady.
– Bul – elge qajetti jobalar, perınataldyq ortalyqtar men óńirlik aýrýhanalar, jylý jáne gaz jelileri, avtomobıl joldary men sý ınfraqurylymdary. Investıtsııalardyń mańyzy ınfraqurylymdy damytýmen ǵana shektelmeıdi. Olar tikeleı áleýmettik-ekonomıkalyq nátıje beredi, – dedi Qarjy vıtse-mınıstri.
Jobalardy iske asyrý nátıjesinde shamamen 31 myń jumys orny ashylady. Onyń 25 myńy – turaqty jumys oryndary.
Bıýdjetke shamamen 3,7 trln teńge salyq túsimi túsedi dep kútilýde. Jobalardy iske asyrý shamamen 13 mıllıon adamdy qajettiliktermen qamtamasyz etýge múmkindik beredi.
– Bul – bolashaq urpaqqa salynǵan ınvestıtsııa. Ózderińiz bilesizder, Ulttyq qordan balalarǵa tikeleı qarajat aýdarylyp keledi. Sonymen qatar, memlekettiń mindeti – óskeleń urpaqtyń bolashaǵyna qajetti zamanaýı ári sapaly ınfraqurylym qalyptastyrý. ıAǵnı búgin júzege asyrylyp jatqan jobalar keleshekte óskeleń urpaqtyń ıgiligine qyzmet etedi, – dedi A. Beısenbekuly.
Buǵan deıin Qarjy vıtse-mınıstri ekonomıkanyń naqty sektoryn damytýǵa 3,7 trln teńge bólinetinin aıtqan edi. Qarajat kólik ınfraqurylymyn, aýyl sharýashylyǵyn, ónerkásip pen qurylysty, kásipkerlikti jáne tsıfrlyq damýdy qoldaýǵa jumsalady.
Óńirlerdi qoldaýǵa jyl saıyn bıýdjettiń tórtten bir bóligi nemese 7,4 trln teńge (24,8%) jiberiledi.
Sondaı-aq Halyq Keńesin qurýǵa bıýdjetten 1,7 mlrd teńge bólinedi.
