Ulttyq qordan mamyrda 500 mln dollar satyldy
ASTANA. KAZINFORM — Mamyr aıynda respýblıkalyq bıýdjetke transfertter bólýdi qamtamasyz etý maqsatynda Ulttyq qordan 500 mln AQSh dollary kóleminde valıýta satyldy.
Mamyr aıynyń qorytyndysy boıynsha teńge baǵamy 5,1%-ǵa álsirep, 1 AQSh dollary úshin 486,51 teńge deńgeıinde qalyptasty. Qazaqstan qor bırjasyndaǵy saýda-sattyqtyń ortasha kúndik kólemi bir aıda 394 mln AQSh dollarynan 392 mln AQSh dollaryna deıin tómendedi. Saýda-sattyqtyń jalpy kólemi 6,7 mlrd AQSh dollaryna jetti.
— Mamyr aıynda respýblıkalyq bıýdjetke transfertter bólýdi qamtamasyz etý maqsatynda Ulttyq qordan 500 mln AQSh dollary kóleminde valıýta satyldy. Bul rette Ulttyq qordan satý úlesi jalpy saýda-sattyq kóleminiń 7,5%-yn nemese kúnine shamamen 29,4 mln AQSh dollaryn kórsetti, — delingen Ulttyq bank habarlamasynda.
Kútiletin fıskaldyq túsimderdi jáne Úkimettiń aldyn ala boljamdy ótinimderin eskere otyryp, Ulttyq bank maýsym aıynda respýblıkalyq bıýdjetke transfertter bólý úshin Ulttyq qordan 200 mln AQSh dollarynan 300 mln AQSh dollaryna deıingi mólsherde valıýta satýdy josparlap otyr.
Mamyr aıynda «aınalaý» operatsııalary aıasynda shamamen 354 mlrd teńge alyndy. Maýsym aıynda osy maqsatta 354 mlrd teńge balamasynda valıýta satylady dep kútiledi.
Ulttyq qor qarajatymen operatsııalar júrgizý kezinde, sondaı-aq «aınalaý» tetigin iske asyrý barysynda Ulttyq bank naryqtyq beıtaraptyq qaǵıdatyn ustanady.
Mamyr aıynda Ulttyq bank valıýtalyq ınterventsııa júrgizgen joq.
Ótken aıdyń qorytyndysy boıynsha kvazımemlekettik sektor sýbektileriniń valıýtalyq túsiminiń bir bóligin mindetti satý normasy aıasynda satylǵan valıýta kólemi shamamen 410 mln AQSh dollaryna baǵalandy.
— BJZQ zeınetaqy aktıvteriniń valıýtalyq úlesi 40%-dan tómen bolýyna baılanysty Ulttyq bank mamyr aıynda bırjadaǵy saýda-sattyq barysynda shetel valıýtasyn satyp aldy. Mundaǵy satyp alýdyń jalpy kólemi 878,5 mln AQSh dollary deńgeıinde nemese jalpy saýda-sattyq kóleminiń shamamen 13%-y kóleminde boldy. Aldaǵy sheshimder zeınetaqy aktıvterin ınvestıtsııalyq basqarý aıasynda naryqtaǵy ahýal eskerile otyryp qabyldanady, — delingen habarlamada.
Ashyqtyq qaǵıdaty aıasynda Ulttyq bank valıýta naryǵynda júrgiziletin operatsııalar týraly aqparatty tolyq ashyp kórsetýdi jalǵastyrady. Qysqamerzimdi keleshekte teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady.
Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi.
Aıta ketelik qor naryǵynda dollar baǵamy birshama ósken edi.
