Ulttyq qordan bólingen qarajattyń jumsalýyn monıtorıngteý jónindegi komıssııa jumysyn qaıta bastady
ASTANA. KAZINFORM – Qazaqstanda Ulttyq qordan bólingen qarajattyń jumsalýyna monıtorıng júrgizý jónindegi komıssııa jumysyn qaıta bastady. Bul týraly Joǵary aýdıtorlyq palata habarlady.
2014 jyly qurylǵannan bastap ol QR Ulttyq Bankiniń qaramaǵynda jumys istedi. 2020 jyldan bastap komıssııanyń jumys organy Joǵary aýdıtorlyq palata boldy. Qazirgi ýaqytta Memleket basshysynyń tapsyrmalaryn oryndaý maqsatynda komıssııanyń qyzmeti jańartylǵan formatta jáne jańa qurammen jalǵasady. Uzaq úzilisten keıin bıyl 21 aqpanda Álıhan Smaıylovtyń tóraǵalyǵymen Joǵary aýdıtorlyq palatada komıssııanyń otyrysy ótti.
Jıynǵa Prezıdent Ákimshiliginiń, Ulttyq Banktiń, Bas prokýratýranyń, Sybaılas jemqorlyqqa qarsy is-qımyl agenttiginiń, Qarjy monıtorıngi agenttiginiń, Ulttyq qaýipsizdik komıtetiniń, Qarjy jáne Ulttyq ekonomıka mınıstrlikteriniń laýazymdy tulǵalary, Parlament Májilisi men Senatynyń depýtattary jáne t.b. qatysty.
Memleket basshysy Qasym-Jomart Toqaev ótken jyldyń qyrkúıek aıyndaǵy Qazaqstan halqyna Joldaýynda Ulttyq qordyń erekshe róli men mańyzdylyǵyn taǵy da atap ótti.
– Qordyń qarajatyn, eń aldymen, memleket múddesi úshin, ıaǵnı elimizdiń strategııalyq maqsattaryn júzege asyrý úshin paıdalaný qajet. Ulttyq qor sheteldik qarjy ınstıtýttaryna qyzmet etpeýi kerek. Ulttyq qor – uzaq merzimge arnalǵan makroekonomıkalyq turaqtylyqty qamtamasyz etetin asa mańyzdy qural. Sondyqtan ony tıimdi basqarý qajet, - dedi Prezıdent.
Otyrys barysynda Komıssııa tóraǵasy Álıhan Smaıylov Ulttyq qor qarajatyn jumsaýdyń zańdylyǵy men tıimdiligine monıtorıng júrgizý tásilderi ózektendiriletinin atap ótti.
– Komıssııanyń jumysyn qaıta bastaýymyz kerek. Vedomstvoaralyq is-qımyl men Ulttyq qor qarajatynyń tıimdi jáne maqsatty paıdalanylýyn baqylaý úshin jaýapkershilik aımaqtaryn naqty aıqyndaý qajet, - dedi Álıhan Smaıylov.
«Ulttyq qor – balalarǵa» baǵdarlamasyna baılanysty da jurtshylyqtyń Ulttyq qordy utymdy paıdalanýǵa nazary kúsheıýde.
– Ulttyq qordan alynatyn transfertterden ekonomıkalyq qaıtarym bolýy qajet. Ulttyq qor memlekettik mańyzdy emes mindetterge paıdalanylmaýy tıis. Memleket basshysy osyndaı mindet qoıdy, - dep atap ótti Joǵary aýdıtorlyq palata tóraǵasy.
Álıhan Smaıylov aldaǵy kezeńge arnalǵan mindetterdi atap ótti:
Ulttyq qordan ekonomıkany jeńildetilgen sharttarmen qoldaýǵa bólingen qarajatqa tekserý júrgizý;
Ulttyq qor qarajatyn neǵurlym basym baǵyttarǵa qaıta bólý nemese olardy qaıtarý jóninde usynystar berý. Otyrys barysynda komıssııa quramyn jańartý, onyń qyzmetin jańa formatta reglamentteý, qorytyndylardyń sapasyn arttyrý jáne t. b. máseleler talqylandy. Aıta keteıik, QR Ulttyq qorynan bólingen qarajattyń jumsalýyna monıtorıng júrgizý jónindegi komıssııa konsýltatıvtik-keńesshi organ bolyp tabylady. Ol QR Prezıdentiniń Ókimimen 2014 jyly qurylǵan.
Senator Ulttyq qordan alynǵan árbir tıynnyń tıimdi ıgerilýin baqylaý kúsheıetinin aıtqan edi.