Ulttyq qordan bólingen qarajatty talan-tarajǵa salǵan pavlodarlyq sheneýnik sottaldy

PAVLODAR. KAZINFORM – Pavlodar oblysynyń Pavlodar aýdandyq prokýratýrasy tekserý barysynda naqty sektor ekonomıkasy bólimi basshysynyń óz laýazymyn asyra paıdalanýy týraly faktini anyqtady.

- Bul áleýmettik nysan salý kezinde bolǵan, - dep habarlaıdy Pavlodar oblystyq prokýratýrasynyń baspasóz qyzmeti.

Málimet boıynsha, «Aýyl El-Besigi» memlekettik baǵdarlamasy aıasynda Ulttyq qordan bólingen qarajat esebinen Kemeńger aýylynda sport-saýyqtyrý kesheni salynǵan, onyń quny 382 mln teńge.

Bıýdjet qarajatynyń zańsyz jumsalýyn tekserý barysynda merdigerge oryndalmaǵan jumystardyń kólemi úshin 158 mln teńge tólengeni anyqtaldy.

Aýdan prokýratýrasy laýazymdy tulǵanyń qyzmettik ókilettigin asyra paıdalaný faktisi boıynsha materıaldardy Qylmystyq kodekstiń 361-baby boıynsha ERDR-ǵa tirkedi, aldyn ala tergeýdi sybaılas jemqorlyqqa qarsy departament júrgizdi.

Pavlodar oblysynyń aralyq sotynyń úkimimen burynǵy naqty sektor ekonomıka bóliminiń basshysy 3 jylǵa bas bostandyǵynan aıyrylyp, memlekettik qyzmette laýazym atqarý quqyǵynan ómir boıyna aıyryldy.

Sot aktisi zańdy kúshine engen joq.

Osyǵan deıin Pavlodar oblysynyń sheneýnikteri jumys ýaqytynda shetelde júrgeni týraly jazdyq.