Ulttyq qordan balalarǵa tólenetin soma qalaı qalyptasady
ASTANA. KAZINFORM – Ulttyq bank tóraǵasy Tımýr Súleımenov «Ulttyq qor - balalarǵa» baǵdarlamasy boıynsha tólem somasynyń nege baılanysty bolatyndyǵyna qatysty saýalǵa jaýap berdi.
Onyń aıtýynsha, balalarǵa beriletin soma Ulttyq banktiń qanshalyqty tolyqtyrylatyndyǵyna, odan qansha qarajat alynatyndyǵyna jáne qor aktıvteriniń qanshalyqty tıimdi basqarylatyndyǵyna baılanysty bolmaq.
«Eger sońǵy, Ulttyq qordyń basqarylýyna qatysty elementti alar bolsaq, onda ótken jyldyń qorytyndysynda Ulttyq bank rekordtyq – 6 mlrd dollardan astam kiris aldy. Bul jyldyq mánde – 11 paıyz. Ulttyq qor qurylǵan sátten bergi rekordtyq tsıfr sanalady. Eger Ulttyq bank osylaı jumys istese, eger Úkimet Ulttyq qorǵa únemi túsetin salyqtardy jınaý turǵysynan jumys istese, eger mınıstrlikterdiń, memlekettik holdıngterdiń tarapynan Ulttyq qordan aqsha alýǵa qatysty kóp usynys bolmasa, onda, árıne, bólinýge tıis soma da joǵary bolmaq», - dedi ol elordada ótken brıfıngte BAQ ókilderiniń saýalyna oraı.
Ulttyq bank tóraǵasynyń aıtýynsha, «Ulttyq qor - balalarǵa» baǵdarlamasy eldiń 5 jylǵa arnalǵan áleýmettik-ekonomıkalyq damý boljamyna negizdeledi. Ol bıýdjetpen birge bekitiledi.
«Ol ótken jyldyń kúzinde bekitildi. Úkimetpen munaıǵa qatysty boljamdy talqylaǵan kezde taıaý eki jylda 80 dollar shamasynda bolady degen ortaq tsıfrǵa uıystyq. Odan keıin, eger syrtqy áserler bolmasa baǵa birtindep tómendeı bastaıdy. Sondyqtan Ulttyq qor boıynsha jáne «Ulttyq qor - balalarǵa» baǵdarlamasy boıynsha parametrler ózgermeıdi. Sol sebepti syrtqy orta ózgermeıdi jáne josparlaǵan qarajat sol deńgeıde saqtalady dep úmittenemiz», - dedi Tımýr Súleımenov.
