Ulttyq qordan balalarǵa aqsha aýdarý týraly zańnyń halyq sany 20 mln jetken kúni qabyldanýynyń sımvoldyq máni bar - Qarın

Memlekettik keńesshi Erlan Qarın búgin bekitilgen ulttyq qordan balalarǵa qarajat aýdarý týraly jańa zańǵa pikir bildirdi, dep habarlaıdy Kazinform. 

«Búgin Memleket basshysy óte mańyzdy zańǵa qol qoıdy. Bul — Ulttyq qordan balalarǵa arnalǵan qarajatty esepteý, tóleý jáne paıdalaný máseleleri týraly qujat. Osylaısha Prezıdent Qasym-Jomart Toqaevtyń saılaý aldyndaǵy baǵdarlamasynda kórsetilgen negizgi bastamanyń biri — „Ulttyq qor — balalarǵa“ atty jobany júzege asyrýdyń zańnamalyq negizi qalyptasty. Endi kelesi jyldyń 1 qańtarynan bastap Ulttyq qordyń ınvestıtsııalyq tabysynyń 50 paıyzy jas jetkinshekterdiń arnaýly esepshotyna aýdarylady», - dep jazdy ol Telegram paraqshasynda. 

Onyń aıtýynsha, balalar kámelet jasyna tolǵan soń bul qarajatty turǵyn úı satyp alýǵa nemese bilim alýǵa jumsaıdy.

«Prezıdent osy zańǵa halqymyzdyń sany 20 mıllıonǵa jetken kúni qol qoıdy. Munyń sımvoldyq máni bar deýge bolady», - dep atap ótti Erlan Qarın.

Eske sala keteıik, búgin Memleket basshysy «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Ulttyq qorynan balalarǵa arnalǵan qarajatty esepteý, tóleý jáne paıdalaný máseleleri boıynsha ózgerister men tolyqtyrýlar engizý týraly» zańǵa qol qoıdy.

Zańnyń mátini baspasózde jarııalanady.