Ulttyq qordan balaǵa túsetin aqshanyń kólemi munaı baǵasyna baılanysty bola ma

Ulttyq qordan bala shotyna túsetin aqshanyń mólsheri munaı baǵasy men Ulttyq banktiń ınvestıtsııalyq saıasatyna baılanysty bolady. Qarjy mınıstrliginiń bıýdjettik kredıtteý, ulttyq qor jáne qarjy sektory máseleleri jónindegi ózara is-qımyl departamentiniń dırektory Aıbol Arǵynǵazın vedomstvo uıymdastyrǵan brıfıngide osynda málimet aıtty, dep habarlaıdy Kazinform.

«Ulttyq qordan bala shotyna túsetin aqsha neǵurlym mol bolý úshin qazaqstandyqtar munaı qymbat bolsyn dep tileýi kerek pe?» dep surady jýrnalıst.

Departament dırektory mundaı saýaldyń qısyny bar ekenin aıtady.

«Ulttyq qorǵa túsetin kiris kózi birnesheý. Ashyǵyn aıtqan kezde, onyń basym bóligi shıkizat, mıneraldy ónim eksporttaýdyń esebinen túsetin túsimderden quralady. Ol bizdiń Salyq kodeksinde ashyq kórsetilgen. Sondyqtan sózińizdiń jany bar. Munaıdan, jalpy metallýrgııalyq ónimder eksportynan túsetin tabys artqan saıyn, Ulttyq qordyń da kiristiligi artady deýge bolady», - dedi Aıbol Arǵynǵazın.

Sondaı-aq, ol Ulttyq qordyń ınvestıtsııalyq kiristiligi Ulttyq banktiń jumysyna da baılanysty ekenin eske saldy.

«Ulttyq qordyń kiristiligi ınvestıtsııalyq operatsııalardyń qalaı basqarylǵanyna da baılanysty. Bul operatsııalardyń bárin Ulttyq bank júrgizedi. Ulttyq qor Úkimettiń ıeliginde bolǵanymen, Ulttyq bankke senimgerlik basqarýǵa berilgen. Onyń búkil kiristiligine, tabysy qandaı deńgeıde bolǵanyna, aktıvteri qandaı ınvestıtsııa quraldaryna salynǵanyna Ulttyq bank jaýap beredi», - dedi departament dırektory.