Ulttyq qordan alynǵan 910 mln dollar naryqta satylady
ASTANA. KAZINFORM — Qazan aıynyń qorytyndysy boıynsha teńge baǵamy 1 AQSh dollaryna shaqqanda 453,77 teńgege deıin 3%-ǵa tómendedi.
Qazaqstan qor bırjasyndaǵy saýda-sattyqtyń ortasha kúndik kólemi bir aıda 474 mln AQSh dollarynan 397 mln AQSh dollaryna deıin tómendedi. Saýda-sattyqtyń jalpy kólemi 8,4 mlrd AQSh dollary boldy.
Qazan aıynda altyn satyp alýdy teńestirý operatsııalary aıasynda shamamen 302 mlrd teńge alyndy. Qarasha aıynda osy maqsatta 302 mlrd teńge balamasynda shetel valıýtasy satylady dep kútiledi.
— Úkimettiń ótinimderi aıasynda qarjylandyrýdy qamtamasyz etý qajettiligine baılanysty Ulttyq bank Ulttyq qordan 910 mln AQSh dollaryn satyp aldy. Bul kólem naryq konıýnktýrasy eskerile otyryp, Ulttyq qormen júrgiziletin operatsııalardy teńestirý aıasynda ishki valıýta naryǵynda satylady. Bul shara teńge baǵamyn irgeli faktorlarǵa sáıkes ustap turýǵa jáne alypsatarlyqqa qatysty kúrt aýytqýlarǵa jol bermeýge baǵyttalady, — delingen Ulttyq bank habarlamasynda.
Ulttyq bank Ulttyq qor qarajatymen operatsııalar júrgizý kezinde, sondaı-aq teńestirý tetigin iske asyrý barysynda naryqtyq beıtaraptyq qaǵıdatyn saqtaıdy.
Ulttyq bank qazan aıynda valıýtalyq ınterventsııalar júrgizgen joq.
— Zeınetaqy aktıvteriniń valıýtalyq úlesin ustap turý úshin Ulttyq bank BJZQ-nyń ınvestıtsııalyq basqarýshysy retinde qazan aıynda bırjadaǵy saýda-sattyqta jalpy somasy 568 mln AQSh dollary nemese jalpy saýda-sattyq kóleminiń shamamen 7%-y kóleminde shetel valıýtasyn satyp aldy. Aldaǵy sheshimder de naryqtaǵy ahýal eskerile otyryp zeınetaqy aktıvterin ınvestıtsııalyq basqarý aıasynda qabyldanady, — delingen habarlamada.
Ulttyq bank transparenttilik qaǵıdaty aıasynda valıýta naryǵynda júrgiziletin operatsııalar týraly aqparatty tolyq ashyp kórsetýin jalǵastyrady. Qysqamerzimdi keleshekte teńge dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq Bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi.
Aıta ketelik qor naryǵynda dollar 453 teńge deńgeıinde tur.
