Ulttyq qordan aqsha aýdarylady: eGov-tan balańyzdy tappasańyz ne isteý kerek

Elektrondy úkimet platformasynda keıbir balalardyń tsıfrlyq qujattary joq ekendigi anyqtaldy. Bul týraly Ádilet mınıstrliginiń resmı ókili Talǵat Ýálı málim etti, dep habarlaıdy Kazinform.

«Memleket basshysynyń Jarlyǵyna sáıkes, 1 qańtardan bastap, «Ulttyq qor – balalarǵa» jobasy aıasynda balalarǵa tólem tóleý kúshine enedi. Osyǵan baılanysty kóptegen otandasymyzdyń eGov platformasynan balalarynyń tsıfrlyq qujattaryn tekserýi kezinde keıbir derekterdiń jappaı joq ekendigi anyqtaldy. Bul qandaı da bir qatelikten, ne bolmasa kemshilikten, tehnıkalyq aqaýdan emes. 2008 jyldan bastap týǵan balalardyń qujattary ǵana tsıfrlyq formatqa ótken bolatyn», – dedi Talǵat Ýálı agenttik tilshisiniń saýalyna oraı.

Osy rette mınıstrlik ókili balalardy eGov platformasyna tirkeý joldaryn atady.

«Eger balańyzdyń derekteri eGov-ta joq bolsa, onda platformada «balany qosý» degen batyrma bar. Sony basyp, balanyń JSN nómirin engizý arqyly tirkeleı alasyz. Eger sol tirkeý kezinde aqparattar shyqpaı jatsa, onda «túzetý» batyrmasyna ótip, óz qujatyńyzdy, balalaryńyzdyń týý týraly kýáligin engizesiz», – dedi ol.

 

Eske salaıyq, 16 jeltoqsan kúni Prezıdent Qasym-Jomart Toqaev Ulttyq qordan balalarǵa qarajat aýdarýdy qarastyratyn zańǵa qol qoıdy. 

Keıin Qarjy mınıstrliginiń ókili balaǵa túsken aqshany qaıdan tekserip otyrýǵa bolatynyn málim etti.