Ulttyq qordan $400 mln satyldy
ASTANA. KAZINFORM – Naýryz aıynyń qorytyndysy boıynsha teńge baǵamy 1 AQSh dollary úshin 478,15 teńgege deıin 3,9%-ǵa nyǵaıdy.
Qazaqstan qor bırjasyndaǵy saýda-sattyqtyń ortasha bir kúndik kólemi bir aıda 335 mln AQSh dollarynan 372 mln AQSh dollaryna deıin ulǵaıdy. Saýda-sattyqtyń jalpy kólemi 6,7 mlrd AQSh dollar boldy.
Naýryz aıynda Ulttyq qordan 400 mln AQSh dollarynda valıýta satylyp, ol respýblıkalyq bıýdjetke transfert bólýdi qamtamasyz etýge múmkindik berdi. Ulttyq qordan satý úlesi jalpy saýda-sattyq kóleminiń 6%-y nemese kúnine 22 mln AQSh dollaryna jýyq boldy.
Kútiletin fıskaldyq túsimderdi eskergende, Úkimettiń aldyn ala boljamdy ótinimderi boıynsha respýblıkalyq bıýdjetke transfert bólýge Ulttyq bank sáýir aıynda Ulttyq qordan 300 mln AQSh dollarynan 400 mln AQSh dollaryna deıingi mólsherde valıýta satylady dep boljaıdy.
Naýryz aıynda «aınalaý» operatsııalary aıasynda shamamen 350 mlrd teńge alyndy. 2026 jylǵy II toqsanda «aınalaý» operatsııalary aıasynda shamamen balamasy 1,1 trln teńgege shetel valıýtasyn satý josparlanyp otyr.
Ulttyq qordyń qarajatymen operatsııalar júrgizý kezinde, sondaı-aq «aınalaý» tetigin iske asyrý kezinde Ulttyq bank naryqtyq beıtaraptyq qaǵıdatyn ustanady. Ol shetel valıýtasyn turaqty jáne birkelki satýdy bildiredi.
Ulttyq bank naýryz aıynda valıýtalyq ınterventsııa júrgizgen joq.
Ótken aıdyń qorytyndysy boıynsha kvazımemlekettik sektor sýbektileriniń valıýtalyq túsimniń bir bóligin mindetti túrde satý normasy aıasynda valıýta túsimin satý kólemi shamamen 391 mln AQSh dollar boldy.
Osyǵan deıingi josparǵa sáıkes Ulttyq bank naýryz aıynda zeınetaqy aktıvteriniń ınvestıtsııalyq portfeline AQSh dollaryn satyp almady. Budan keıingi sheshimder BJZQ zeınetaqy aktıvteri portfeliniń teńgerimdi ınvestıtsııalyq qurylymyn qoldaý qajettiligin men aǵymdaǵy naryqtyq jaǵdaıdy eskere otyryp qabyldanatyn bolady.
Ashyqtyq qaǵıdaty aıasynda Ulttyq bank valıýta naryǵynda júrgiziletin operatsııalar týraly aqparatty tolyq ashyp kórsetýdi jalǵastyrady. Qysqamerzimdi keleshekte teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi.
Aıta ketelik Joǵary aýdıtorlyq palatanyń tóraǵasy Álıhan Smaıylovtyń qatysýymen ótken komıssııa otyrysynda Ulttyq qor qarajatynyń maqsatqa saı ári tıimdi paıdalanylýyna júrgizilgen tekseris qorytyndysy qaraldy.