Ulttyq qordan 3 aıda 1,45 trln teńge alynǵan

ASTANA. KAZINFORM – Qarjy mınıstrligi 2025 jyldyń úsh aıynda Ulttyq qorǵa qansha aqsha túsip, qansha aqsha transfert retinde alynǵanyn jarııalady. 

Úsh aıda Ulttyq qorǵa barylǵy 631 mlrd 445 mln 533,8 myń teńge kiris túsken. Al osy kezeńde qordan 1 trln 451 mlrd 271 mln 345,8 myń teńge alynǵan. Onyń 1,2 trln teńge kepildendirilgen transfert bolsa, 250 mlrd teńge maqsattyq transfert. Sondaı-aq qordy basqarý shyǵyndaryna 1 mlrd 271 mln 345,8 myń teńge ketken.

Jyl basynda Ulttyq qordaǵy aktıvtiń jalpy somasy 33 trln 60 mlrd 887 mln 543,3 myń teńge bolsa, 1 sáýirdegi jaǵdaı boıynsha 32 trln 241 mlrd 61 mln 731,3 myń teńgege deıin azaıǵan.

2024 jyldyń alǵashqy úsh aıynda da Ulttyq qordan bıylǵymen deńgeıles kólemde aqsha alynǵan edi — 1 trln 451 mlrd 637 mln 857,1 myń teńge. Biraq byltyr úsh aıdyń túsimi bıylǵydan 50 paıyzǵa jýyq joǵary bolǵan — 1 trln 170 mlrd 642 mln 776,5 myń teńge. Túsimniń azaıyp ketýine munaı kompanııalarynan túsetin korporatıvtik tabys salyǵynyń, paıdaly qazba óndirýden alynatyn roıaltıdiń, eksportqa salynatyn renta salyǵynyń, ónimdi bólý kelisimi boıynsha alynatyn úlestiń azaıýy sebepker bolǵan.

Eske salsaq, Ulttyq bank tóraǵasy Tımýr Súleımenov Ulttyq qordan aqsha alýdyń qarqyny nege tómendemeı turǵanyn túsindirgen bolatyn.