Ulttyq qordan 1,5 trln teńge: Almatydaǵy iri jobalardyń sapasy tekserildi
ASTANA. KAZINFORM — Almaty qalasyna jáne Almaty oblysyna jumys saparymen barǵan Premer-mınıstrdiń birinshi orynbasary Nurlybek Nálibaev Ulttyq qor qarjysy salynǵan iri ınfraqurylymdyq, áleýmettik jáne kommýnaldyq jobalardyń júzege asyrylý barysymen tanysty. Bul týraly Úkimettiń baspasóz qyzmeti málim etti.
Memleket basshysynyń tikeleı qoldaýymen jobalardy iske asyrýǵa Ulttyq qordan qomaqty qarajat bólinýde. Tek bıyldyń ózine qaralǵan 1,5 trln teńge qarjynyń shamamen 60–70%-y densaýlyq saqtaý salasyna baǵyttalǵan.
Sonymen qatar Memleket basshysy Qazaqstan Halyq Keńesiniń birinshi sessııasynda aımaqtardaǵy turǵyn úıler, áleýmettik nysandar, jol qurylysyn sapaly ári ýaqytyly júzege asyrýdyń mańyzyna toqtaldy.
— Keıde jańadan salynǵan keıbir nysandardyń sapasy syn kótermeıdi, tipti, qoǵam talqysyna túsip jatady. Bul turǵydan alǵanda, jol salasyndaǵy ahýal da máz emes. Sondyqtan jol sapasyn baǵalaý júıesin qaıta qaraý kerek. Qurylys jumysyn basynan aıaǵyna deıin qatań qadaǵalaý qajet. «Jol aktıvteri sapasynyń ulttyq ortalyǵy» mekemesiniń qyzmetin kúsheıtý kerek. Jalpy, osy salaǵa túbegeıli reforma jasaǵan jón, — dep atap ótti ol.
Jumys sapary kezinde Úkimet basshysynyń birinshi orynbasaryna Almaty halyqaralyq áýejaıynyń ınfraqurylymyn odan ári damytý jospary tanystyryldy. Josparda termınal jáne ushý-qoný ınfraqurylymyn jańǵyrtý, jańa rýldeý jolaǵyn, júk perronyn salý jáne servıstik nysandardy damytý kózdelgen.
Mamyr aıyndaǵy saparynda Úkimet basshysynyń birinshi orynbasary Almaty qalasynyń ákimimen birge áýejaıdaǵy jumys sapasyn, onyń talaptarǵa saı kelmeıtin kemshin tustaryn synǵa alyp, merdiger mekemege naqty mindetter júktegen bolatyn. Osy joly sol kezde berilgen tapsyrmalardyń oryndalý deńgeıine basa nazar aýdaryldy.
Odan keıin 8 shaqyrymdyq R-17 «Almaty — Talǵar — Báıdibek bı» avtojolynyń tórt jolaqqa deıin keńeıtilýi josparlanǵan aýmaqty, «Almaty — Bishkek» avtojolynyń 7 shaqyrymyn qaıta jańǵyrtý jobasyn qarap shyqty. Munda jol tórt jolaqtan segiz jolaqqa deıin keńeıtilip, eki jolaıyryq jáne toǵyz jerústi júrginshi ótkeli salynady. Joba Almaty men qala mańyndaǵy negizgi baǵyttardyń biriniń kólik qozǵalysyn jeńildetip, jol ınfraqurylymynyń múmkindigin keńeıtedi.
Kelesi nysan — Qalqaman shaǵyn aýdanyndaǵy № 7 qalalyq klınıkalyq aýrýhana. Ol jańartýdan keıin 900 oryndyq bolady. Joba aýrýhana korpýstary men ınjenerlik júıelerin jańartýdy, qurylymdardy kúsheıtýdi jáne zamanaýı medıtsınalyq jabdyqtarmen jaraqtandyrýdy qamtıdy.
Almatynyń densaýlyq saqtaý salasyn damytýǵa Ulttyq qordan 66 mlrd teńge, respýblıkalyq bıýdjet qarajaty men aldaǵy jylǵa josparlanǵan qarjylandyrýdy qosa eseptegende, 196 mlrd teńge qarastyrylǵan.
— Memleket basshysy qarajattyń 60–70%-yn dál osy densaýlyq saqtaý nysandaryn salýǵa bólýdi tapsyrdy, óıtkeni halyqqa birinshi kezekte zamanaýı medıtsınalyq ınfraqurylym qajet. Endi osy qarajatty ıgerip, barlyq jumysty der kezinde aıaqtap, nysandardy halyq ıgiligine berý kerek. Bul — Úkimet basshysynyń da baqylaýyndaǵy asa mańyzdy jobalar, — dedi Nurlybek Nálibaev.
Sapar barysynda Saın kóshesin Almaty qalasynyń shekarasynan Úlken Almaty aınalma avtomobıl jolyna deıin uzartý jobasy da qaraldy. Jańa aýmaqtyń uzyndyǵy 6,6 shaqyrym, joba boıynsha jol, ınjenerlik kommýnıkatsııalar jáne temirjol ústinen ótetin jol ótkeli salynady. Bul qalanyń Qarasaı aýdanymen jáne ÚAAAJ arqyly kólik baılanysyn jaqsartady.
Búkil aglomeratsııa úshin mańyzy bar taǵy bir joba — Almatynyń batys káriz kollektory. Negizgi ýchaskeniń uzyndyǵy 35 shaqyrym, búginde 17,9 shaqyrym qubyr tartylǵan. Joba aıaqtalǵannan keıin Almatynyń Naýryzbaı jáne Alataý aýdandarynyń, sondaı-aq Almaty oblysynyń irgeles aýmaqtarynyń shamamen 200 myń turǵyny ortalyqtandyrylǵan sý burý júıesine qosylý múmkindigine ıe bolady.
Budan keıingi nysan — 3,4 shaqyrym Abaı dańǵylyn ÚAAAJ-ǵa deıin uzartý jobasy. Onyń maqsaty — jol, Aqsaı ózeni arqyly kópir jáne ÚAAAJ ústinen jol ótkelin salý. Jańa aýmaq Almatydan shyǵatyn qosymsha baǵyt qalyptastyryp, Qarasaı aýdanymen kólik baılanysyn tıimdi etedi.
Almatynyń áleýmettik nysandarymen tanysý Seıfýllın kóshesindegi 155 oryndyq № 1 qalalyq perzenthanaǵa jáne Áıteke bı kóshesindegi bir aýysymda 500 kelýshi qabyldaýǵa eseptelgen emhanaǵa barýmen jalǵasty.
Atalǵan nysandarda tek qala turǵyndaryna ǵana emes, búkil aglomeratsııaǵa qyzmet kórsetiledi.
Buǵan deıin QR Premer-mınıstriniń birinshi orynbasary Nurlybek Nálibaev Kólik mınıstrliginde Úkimet basshysy Oljas Abaıulynyń tapsyrmasyna sáıkes uıymdastyrylǵan «Sapaly joldar: josparlaýdan paıdalanýǵa deıin» taqyrybyndaǵy úsh kúndik respýblıkalyq semınar-keńestiń qorytyndy otyrysyna qatysqanyn jazdyq.
