Ulttyq qor men syrttan qaryz alý ósip keledi – Erlan Qoshanov

ASTANA. KAZINFORM — Endi Májilis memlekettik organdardyń ǵana emes, kvazımemlekettik sektor men bıýdjetten tys qorlardyń da shyǵysy men fıskaldyq mindettemesin tolyq kórip otyrady. Bul týraly Májilis tóraǵasy Erlan Qoshanov málim etti.

— Bıyl ókinishke qaraı bıýdjettiń kiris bóligin josparlaý men oryndaýda ketken kemshilikterge baılanysty másele bar. Sonyń saldarynan Ulttyq qordan qarajat alý men syrttan qaryz alý kólemi artyp keledi. Depýtattardyń bul alańdaýshylyǵy oryndy dep sanaımyn. Tıisti memlekettik organdar atalǵan másele boıynsha qorytyndy jasalýlary kerek. Joǵarydaǵy syn-eskertpelerdiń birazy burynnan aıtylyp júr. Bul — júıeli problema. Olar júıeli sheshimdi qajet etedi. Árıne, synaý da kerek. Biraq, osy máselelerdiń qalaı sheshilip jatqany týraly da búgin aıtýymyz kerek dep oılaımyn, — dedi Erlan Qoshanov Májilistiń jalpy otyrysynda.

Májilis spıkeriniń málimdeýinshe, depýtattar atalǵan máseleni zańnamalyq deńgeıde sheshý úshin jyl boıy belsene jumys istedi.

— Memleket basshysynyń tapsyrmasymen jańa Bıýdjet kodeksi ázirlendi. Onda burynnan kele jatqan túıtkilderdiń deni eskerilgen. Osylaısha, jańa Bıýdjet kodeksi burynǵy modeldiń olqy tustaryn — bólshektenýdi, jarııasyzdyqty jáne baqylaýdyń álsizdigin joıýǵa baǵyttalǵan. Endi biz, depýtattar memlekettik organdardyń ǵana emes, kvazımemlekettik sektor men bıýdjetten tys qorlardyń da shyǵystary men fıskaldyq mindettemesin tolyq kórip otyramyz. Búkil bıýdjet protsesi tsıfrlandyrylyp, ashyq bolady. Qarjylyq tártip kúsheıe túsedi, — dep málimdedi tóraǵa.

Buǵan deıin Ulttyq bank nege halyqqa Ulttyq qordy basqarý kórsetkishteri týraly ashyq esep bermeı otyrǵany týraly jazǵan edik. 

Sondaı-aq Joǵary aýdıtorlyq palata tóraǵasy Álıhan Smaıylov salyq óndirýdiń tómendeýi Ulttyq qordan alynatyn transfertti kóbeıtýge májbúrlegenin aıtty.