Ulttyq qor qarjysyn sheteldik kompanııalardyń qundy qaǵazdaryna salýdy azaıtý kerek – Qaıyrbek Arystanbekov
ASTANA. KAZINFORM – Ekonomıkalyq saıasat ınstıtýtynyń dırektory, Prezıdent janyndaǵy Ulttyq quryltaı múshesi Qaıyrbek Arystanbekov Prezıdent Joldaýynyń Ulttyq qor qarajatyna arnalǵan tusynyń mánin túsindirdi.
«Ulttyq qordyń eki strategııalyq fýnktsııasy bar. Birinshisi – qysyltaıań zamanda turaqtandyrý. Ekinshisi – keler urpaqtyń ıgiligine qarajat jınaqtaý. Ókinishke qaraı, bizdiń Ulttyq qordyń kóbeıý jyldamdyǵyn basqa eldermen salystyrsaq, óte tómen. Bul endi Ulttyq bank pen Qarjy mınıstrligine qoıylatyn suraq, basqaryp otyrǵan solar. Mysaly, Norvegııanyń ulttyq qorynyń jyldyq tabysy bizdikinen eki ese kóp.
Prezıdent bul Joldaýynda Ulttyq qordyń bir bóligin syrtqa emes, ishke salý kerek degendi meńzedi dep oılaımyn. Bankterde aqsha kóp, biraq olar ekonomıkany nesıelendirip jatqan joq. Másele sonda. Biraq bank memleketten táýelsiz bolǵandyqtan, ekonomıkany Ulttyq qor arqyly da qarjylandyrý qajettigi sóz bolyp otyr. Olar qazir tutyný nesıeleri arqyly halyqpen ǵana jumys istep jatyr. Al óndiriske, ınfraqurylymdyq jobalarǵa bankten bólinetin nesıe az», - dedi sarapshy Kazinform tilshisiniń suraǵyna bergen jaýabynda.
Onyń aıtýynsha, qazir Ulttyq qor qarajatynyń bir bóligi sheteldik qundy qaǵazdar satyp alýǵa, aktsııalar men oblıgatsııalarǵa, derıvatıvterge salynǵan.
«Onyń paıyzy tómen, ıaǵnı Ulttyq qor aqshasyna qaı kompanııanyń aktsııasyn satyp alsaq, solardy baıytyp otyrmyz deýge bolady. Sheteldik qarjy ınstıtýttaryna qyzmet etpeýi kerek dep osyny meńzedi dep oılaımyn», - deıdi ekonomıst.
Qaıyrbek Arystanbekov Ulttyq qordyń aqshasyn túgel ishki ekonomkaǵa salý múmkin emes ekenin de aıtady.
«Ulttyq qordyń bir bóligin jumsaý dep beker aıtyp turǵan joqpyn. Qordaǵy búkil aqshany ekonomıkaǵa salý degen múmkin emes. Óıtkeni bárin ekonomıkaǵa salsaq, makroekonomıkalyq táýekelder týyndaýy múmkin. Olaı bolmaý úshin ekonomıkamyzdyń Ulttyq qordyń qansha aqshasyn qoryta alatynyn, ol shamamen qansha soma ekenin eseptep shyǵarý kerek. Qorytý qabyletinen kóp aqsha salynsa, ınflıatsııanyń órshýi sııaqty kóptegen keri áseri paıda bolýy múmkin.
Ekonomıkamyzdyń qorytý shegin anyqtaǵannan keıin Ulttyq qor aqshasyn tek óndiristik jáne ınfraqurylymdyq jobalarǵa ǵana bólý kerek dep oılaımyn. Bıylǵy jaǵdaılarǵa baılanysty sý jınaqtap saqtaýǵa baǵyttalǵan ınfraqurylymdarǵa salýǵa bolady. Biraq ol valıýta naryǵyna túspeý kerek, ıaǵnı baǵanyń kóterilýine jol ashpaýy qajet. Bular – Ulttyq bank pen Qarjy mınıstrliginiń quzyryndaǵy sharýa. Sol eki mekemege júktelip otyrǵan mindet dep oılaımyn», - deıdi Ulttyq quryltaı múshesi.
Aıta ketsek, búgingi Qazaqstan halqyna Joldaýynda Memleket basshysy Qasym-Jomart Toqaev Ulttyq qordyń róline jeke toqtaldy. Prezıdent qor qarajatyn, eń aldymen, memleket múddesi úshin, ıaǵnı elimizdiń strategııalyq maqsattaryn júzege asyrý úshin paıdalaný qajettin aıtty.
