Erlan Qoshanov: Ulttyq qor qarajatyn paıdalaný praktıkasyn doǵarý qajet

ASTANA. KAZINFORM – Májilis spıkeri Erlan Qoshanov Úkimettiń Ulttyq qor qarajatyn jumsaýyn synǵa aldy.

«Sońǵy jyldary Úkimet Ulttyq qordan transfertterdi ulǵaıtyp, bıýdjetti teńgerimdi kúıde ustaı almaı keledi. 2025 jyly Ulttyq qordan kepildendirilgen jáne nysanaly transfertter kólemi 5,3 trln teńgeni qurap otyr. Bul týraly da búgin aıtyldy. Alaıda, Memleket basshysynyń transfertterdi qysqartý qajettigi týraly birneshe márte bergen tapsyrmasy bar. Qordan iri kólemde qarajat shyǵarý, onyń aktıvterin 2029 jylǵa qaraı 100 mlrd AQSh dollarǵa jetkizýde táýekel týdyrady», - dedi Erlan Qoshanov Májilistiń jalpy otyrysynda 2025-2027 jyldarǵa arnalǵan respýblıkalyq bıýdjetti talqylaýdy qorytyndylaı otyryp.

Osy oraıda Májilis spıkeri Ulttyq qor – bolashaq urpaqqa arnalǵan qarjy murasy ekenin eske saldy. 

«Ulttyq qor qarajatyn aǵymdaǵy qajettilikterge paıdalaný praktıkasyn doǵarý qajet. Búginde jeti mıllıonǵa jýyq bala Ulttyq qordan tólem alady, búkil el qor qarajatynyń jumsalýyn jiti qadaǵalap otyr», - dep tolyqtyrdy E. Qoshanov. 

Buǵan deıin Erlan Qoshanov bıýdjet kirisiniń tómendeýi jyldar boıy jalǵasyp kele jatqanyn aıtyp, Úkimetke birqatar mindet júktedi.