«Ulttyq qor – balalarǵa» jobasy aıasynda balalarǵa 2,3 mlrd dollar bólindi
ASTANA. KAZINFORM – Qazaqstanda Prezıdenttiń bastamasymen iske qosylǵan «Ulttyq qor – balalarǵa» baǵdarlamasy bolashaq urpaqtyń qarjylyq turaqtylyǵyn qamtamasyz etýdiń mańyzdy tetigine aınalyp otyr.
Baǵdarlama Memleket basshysy Qasym-Jomart Toqaevtiń bastamasymen 2024 jyly iske qosyldy. Jobaǵa sáıkes Ulttyq qordyń jyl saıynǵy ınvestıtsııalyq tabysynyń 50 paıyzy balalardyń arnaıy jınaqtaýshy shottaryna aýdarylady.
– Jınaqtalǵan qarajatty balalar 18 jasqa tolǵannan keıin turǵyn úı satyp alýǵa nemese bilim alýǵa paıdalana alady, – delingen Úkimettiń habarlamasynda.
Baǵdarlama iske qosylǵan alǵashqy jyly oǵan 6,91 mıllıon bala qatysty. Sol kezde árbir qatysýshynyń shotyna 100,52 AQSh dollary kóleminde qarajat aýdarylǵan.
2025 jyly baǵdarlamaǵa qatysýshylar sany 6,92 mıllıon balaǵa jetip, bir balaǵa eseptelgen tólem kólemi 129,38 dollarǵa deıin ósti.
Al 2026 jylǵy qorytyndy boıynsha qarajat 6,91 mıllıon balanyń shotyna aýdarylyp, tólem mólsheri 130,71 AQSh dollaryn qurady.
– Baǵdarlama bastalǵannan beri qatysyp kele jatqan balalardyń jınaǵy ınvestıtsııalyq tabysty qosa eseptegende 370,56 AQSh dollaryna jetti, – dep habarlandy.
Úsh jyl ishinde joba aıasynda jalpy kólemi 2,3 mlrd AQSh dollary bólingen.
Onyń ishinde kámelet jasyna tolǵan jastardyń shottaryna 238,5 mln dollardan astam qarajat aýdaryldy.
Baǵdarlamany paıdalaný kórsetkishteri de artyp keledi.
– Búginde 297 myńnan astam ótinim maquldanǵan. Onyń ishinde turǵyn úı jaǵdaıyn jaqsartýǵa 187 myńnan astam ótinim boıynsha 33 mln dollardan astam qarajat baǵyttaldy. Al bilim alýǵa 110 myńnan astam ótinim maquldanyp, 19 mln dollardan astam qarjy jumsaldy, – delingen málimette.
Aıta keteıik, Qazaqstanda 6,9 mıllıonnan astam balanyń quqyǵyn qorǵaýǵa 1,3 trln teńge bólindi.
