«Ulttyq qor – balalarǵa» jobasy aıasynda 7 mln-ǵa jýyq balanyń esepshotyna 2,5 mlrd dollar aýdaryldy
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda «Ulttyq qor – balalarǵa» jobasy aıasynda 7 mıllıonǵa jýyq balanyń esepshotyna 2,5 mıllıard dollar aýdarylǵanyn atap ótti.
– Men elimizdiń eń basty baılyǵy – adamdar ekenin únemi aıtamyn. Ózderińizge málim, halqymyzdyń sany turaqty túrde ósip keledi. Búginde biz 20,5 mıllıonnan astyq. Biraq másele turǵyndardyń sanynda emes, adam kapıtalynyń sapasynda. Qazaqstan óz azamattaryna árdaıym qamqorlyq tanytyp, áleýmettik memleket retindegi mártebesin nyǵaıtyp keledi. Qazirgi tańda memlekettik bıýdjettiń 50 paıyzdan astamy áleýmettik salaǵa tıesili. Al adam kapıtalyn damytýǵa arnalǵan ınvestıtsııa kólemi jyl saıyn shamamen bir trıllıon teńgege ósýde. Bul kóp qarajat dep aıtsaq, qate bolmas. Sondyqtan munyń bárin qalypty nárse dep qabyldaýǵa bolmaıdy. Sebebi osyndaı aýqymdy áleýmettik qamqorlyq, bul – eń aldymen, el azamattarynyń tabandy eńbeginiń jemisi jáne nátıjesi. Mysaly, ana men balany qoldaý sharalaryn alaıyq. Kóptegen damyǵan memlekette, sonyń ishinde Eýropa elderinde áıelder balany dúnıege ákelgen soń birneshe aıdyń ishinde jumysqa shyǵýǵa mindetti. Al Qazaqstanda jaǵdaı múldem basqasha. Memleket ata-analarǵa jan-jaqty qoldaý kórsetedi. Túrli járdemaqylar, jeńildikter qarastyrylǵan. Olarǵa jumys ornyn saqtaı otyryp, úsh jylǵa deıin eńbek demalysyn alýǵa múmkindik berilgen. Bir sózben, ata-analar bala tárbıesimen alańsyz aınalysa alady. Meniń bastamammen «Ulttyq qor – balalarǵa» jobasy júzege asyrylyp jatqanyn bilesizder. Búginge deıin 18 jasqa tolmaǵan 7 mıllıonǵa jýyq balanyń arnaıy esepshotyna 2,5 mıllıard dollardan astam qarjy aýdaryldy, - dedi Qasym-Jomart Toqaev.
Eske sala keteıik, buǵan deıin Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóılegenin jazǵanbyz.
