Ulttyq qor – balalarǵa: jınaqtalǵan soma qanshalyqty ósti

ASTANA. KAZINFORM – Qarjy mınıstrligi men Ulttyq bank «Ulttyq qor – balalarǵa» baǵdarlamasy aıasynda jınaqtalatyn qarajatqa túsinik berdi.

Búgin Senattyń jalpy otyrysynda depýtat Nurtóre Júsip bıyl jyl basynda Qazaqstan azamaty sanalatyn balalarǵa Ulttyq qordan alǵashqy qarajat jınaq qoryna kelip túskenin, bul baǵdarlamaǵa qatysýshylardyń jalpy sany 6 mln 919 myń balany quraǵanyn eske saldy.

- Ulttyq qordan maqsatty transfertter tartý qordyń aktıvterine jáne «Ulttyq qor – balalarǵa» baǵdarlamasyn júzege asyrýǵa qalaı áser etedi? Biz keleshek urpaqtyń nesibesine qol salyp, qol salǵanda - mol salyp otyrǵan joqpyz ba? 2024 jyldyń sońyna deıin jáne keler jyldary ár balaǵa qandaı soma aýdarylady? - dep surady senator.

Óz kezeginde Qarjy mınıstri Mádı Takıev bıyl «Ulttyq qor – balalarǵa» jobasy aıasynda 1 aqpanda 7 mln-ǵa jýyq balaǵa 100 dollar 52 tsentten aýdarylǵanyn aıtty.

- Qazir (qordaǵy qarjy) dollarmen esepteledi jáne osy soma qosymsha ınvestıtsııalanady. Sondyqtan jınaq ósip jatyr. Investıtsııalyq kiriske toqtalsaq, bıyl biz 2,6 paıyzben sanadyq. Kelesi jyly 3% ınvestıtsııalyq ósim bolady dep boljam jasap otyrmyz. Sondyqtan biz 1 qańtardaǵy sandy eskerip, balalarǵa 118-120 dollar bolatyn shyǵar dep otyrmyz. Biraq ony 1 aqpanǵa deıin taǵy bir naqty esepteý kerek, - dedi Qarjy mınıstri.

Ulttyq bank tóraǵasy Tımýr Súleımenovtiń sózine qaraǵanda, «Ulttyq qor – balalarǵa» jobasy boıynsha balalarǵa tıesili soma 890 mln dollarǵa jetken.

- Aldyn ala esep boıynsha jan basyna shaqqanda ár balaǵa – 130 dollar. Mádı Tákıev (Qarjy mınıstri) aıtqandaı, 1 qańtarǵa deıin dúnıege kelgen balalar sanyn, olardyń qaı bóligi 18 jasqa tolǵanyn eseptep, tıisti aqparatty jarııalaımyz. Jalpy balalarǵa arnalǵan osy qarajat ınflıatsııadan qorǵalǵan, sebebi dollarmen saqtalady, - dedi UB basshysy.

Eske sala keteıik, bıyl 1 qańtarda «Ulttyq qor – balalarǵa» jobasy resmı iske qosyldy.

Joba alǵashynda 7 mıllıonnan astam balany qamtydy. Osy oraıda Kazinform agenttigi 7 mıllıonnan astam balanyń ata-anasyna arnap, jobanyń eń mańyzdy tustaryn tizip shyqqan edi.