«Ulttyq qor — balalarǵa»: Úsh jylda 6,5 mln balanyń esepshotyna 2,3 mlrd dollar aýdaryldy
ASTANA. KAZINFORM — Qazaqstan — tabıǵı baılyqty azamattardyń bastapqy kapıtaly retinde bekitken aımaqtaǵy alǵashqy memleket. Bul týraly Prezıdent Qasym-Jomart Toqaev málimdedi.
— Biz arnaıy konstıtýtsııalyq normaǵa súıene otyryp, tabıǵı baılyqty azamattardyń bastapqy kapıtaly retinde bekittik. Qazaqstan — osyndaı biregeı bastamany iske asyrǵan aımaqtaǵy alǵashqy memleket. «Ulttyq qor — balalarǵa» baǵdarlamasy — sonyń aıqyn dáleli, — dedi Qasym-Jomart Toqaev Parlament palatalarynyń sońǵy birlesken otyrysynda.
Bul jobanyń tıimdiligi joǵary: úsh jyldyń ishinde 6,5 mıllıon balanyń esepshotyna 2,3 mıllıard dollar aýdarylǵan.
— Sondaı-aq biz qamqorlyq sharalarynyń naqty jalǵasy retinde «Keleshek» jınaqtaý júıesin iske qostyq. Daryndy balalarǵa, sonyń ishinde halyqaralyq olımpıada jeńimpazdaryna júıeli túrde qoldaý kórsete bastadyq. Bolashaqqa ınvestıtsııa salý degenimiz de — osy. Al, aınalamyzda, ıaǵnı Eýrazııa qurlyǵynda qaı memleket áleýmettik maqsattarǵa osynshama qomaqty qarajatty bólip berip jatyr? Jaýap belgili sııaqty, — dedi Prezıdent.
Buǵan deıin Prezıdent Quryltaı saılaýyn ótkizý týraly arnaıy Jarlyqqa qol qoıatynyn, onyń quramyna úzdikter ǵana kirýi keregin aıtqan edi.
30 jylda Parlament 3,5 myńǵa jýyq zań qabyldaǵan.
Sondaı-aq, Elektrondyq Parlamentti damytýǵa basymdyq beriledi.
