Ulttyq qor - balalarǵa: 2025 jyldyń tólemderi esepshottarǵa qashan túsedi
ASTANA. KAZINFORM — 1 qańtaryndaǵy jaǵdaı boıynsha 2024 jylǵy 1 aqpannan bastap «BJZQ» AQ nysanaly jınaq alý boıynsha 205 505 ótinishti oryndady.
Jalpy somasy 31,61 mıllıon AQSh dollarynan astam qarajat ýákiletti operatorlarǵa aýdaryldy. Olar, óz kezeginde, qarajatty 18 jasqa tolǵan ótinish berýshi azamattardyń banktik shottaryna esepteıdi.
Onyń ishinde turǵyn úı jaǵdaıyn jaqsartý maqsatynda 19,69 mln AQSh dollaryna 127 445 ótinish, bilim berý aqysyn tóleý úshin 11,92 mln AQSh dollaryna 78 060 ótinish qanaǵattandyryldy.
Esterińizge sala keteıik, nysanaly jınaqtardy alýshy barlyq somany nemese onyń bir bóligin ǵana paıdalanýǵa quqyly, paıdalanylmaǵan soma nysanaly jınaqtaý shotynda qalady.
Turǵyn úıdi jaqsartýǵa arnalǵan qarajatty paıdalanýdyń eń tanymal qosalqy maqsattary:
odan ári jınaqtaý úshin turǵyn úı qurylysy jınaqtaryndaǵy salymdy tolyqtyrý (19,27 mln AQSh dollaryna 124 490 ótinish oryndaldy), turǵyn úı satyp alýǵa ıpotekalyq turǵyn úı qaryzyn alý úshin bastapqy jarnany engizý — 145,39 myń AQSh dollaryna 999 ótinish, azamattyq-quqyqtyq mámileler boıynsha menshikke turǵyn úı satyp alý (túpkilikti esep aıyrysý) — 108,64 myń AQSh dollaryna 757 ótinish.
Bilim berý aqysyn tóleý sheńberindegi eń tanymal qosalqy maqsattar:
Qazaqstan Respýblıkasynyń aýmaǵynda ornalasqan bilim berý uıymdarynyń bilim berý qyzmetterine úlestermen (árbir akademııalyq kezeń nemese oqý jyly úshin) nemese tolyq kólemde bir mezgilde (búkil oqý merzimi úshin) aqy tóleý (11,03 mln AQSh dollaryna 71 025 ótinish oryndaldy), bilim berýge jınaqtaý salymy týraly shart boıynsha bilim berýge jınaqtaý salymyn tolyqtyrý (608,47 myń AQSh dollaryna 4 933 ótinish oryndaldy), sheteldik bilim berý uıymdarynyń bilim berý qyzmetterine úlestermen (árbir akademııalyq kezeń nemese oqý jyly úshin) nemese tolyq kólemde birjolǵy (búkil oqý merzimi úshin) aqy tóleýge (228,32 myń AQSh dollaryna 1 706 ótinish oryndaldy) tólem jasaý.
Esepti 2025 jylǵy nysanaly talaptar, sondaı-aq, ınvestıtsııalyq kiris nysanaly talaptarǵa qatysýshylarǵa 2026 jyldyń 1 aqpanyna deıin keshiktirilmeı esepteledi.
Bul rette 2008 jyly týǵan, 2026 jyly 18 jasqa tolatyn qazaqstandyqtardyń nysanaly jınaqtaý shottaryna nysanaly jınaqtardy esepteý de 2026 jyldyń 1 aqpanyna deıin keshiktirilmeı júzege asyrylady.
«Ulttyq qor — balalar» baǵdarlamasy boıynsha turaqty túrde jasalatyn esepter enpf.kz saıtyna ornalastyrylady.
Aıta ketelik jeltoqsanda qazaqstandyqtar BJZQ-dan radıohırýrgııalyq em alýǵa 5,6 mlrd teńge jumsady.