Ulttyq qor — balalarǵa: Smaıylov kámeletke tolǵandardyń paıdalanylmaǵan qarajatyn ınvstıtsııalaýdy usyndy
ASTANA. KAZINFORM — Ulttyq qordyń paıdalanylmaǵan qarajatyn keri qaıtarý tetigine erekshe nazar aýdarý qajet. Bul týraly Parlament palatalarynyń birlesken otyrysynda Joǵary aýdıtorlyq palata tóraǵasy Álıhan Smaıylov aıtty.
— Ulttyq qordy basqarý júıesinde qarajattyń túpkilikti alýshyǵa deıin tsıfrlyq qadaǵalanýyn qamtamasyz etý mańyzdy. Josparlaýdan bastap nátıjelerdi monıtorıngteýge deıin barlyq protsessti avtomattandyrý qajet. Bul rette monıtorıng qarajatty kassalyq ıgerýge emes, sapalyq parametrlerge negizdelýge tıis. Mysaly: tozýdy azaıtý, qýattylyqty keńeıtý, halyqty jumyspen qamtý, qyzmet kórsetý sapasyn arttyrý jáne taǵy basqalar. Ulttyq qordyń paıdalanylmaǵan qarajatyn qordyń ózine qaıtarý tetigi erekshe nazar aýdarýdy talap etedi. Qoldanystaǵy protsedýra olardy qaıtarmaýǵa múmkindik beredi. Al bul rette qaıtarylmaǵan qarajat kólemi qomaqty bolyp otyr, — dedi Álıhan Smaıylov.
Osy oraıda ol Memleket basshysynyń strategııalyq sheshiminiń arqasynda óskeleń urpaqtyń ulttyq resýrstardy bólýge qatysýynyń «Ulttyq qor — balalarǵa» baǵdarlamasy qabyldanǵanyn atap ótti.
— Kámeletke tolǵan azamattardyń shottarynda paıdalanylmaǵan qarajatty ınflıatsııalyq protsesterden qorǵaý úshin, ınvestıtsııalaý kerek dep esepteımiz. Mundaı tájirıbe qazirdiń ózinde zeınetaqy aktıvteri boıynsha qoldanylady, — dedi JAP tóraǵasy.
Aıta keteıik, jalpy otyrysta Májilis pen Senat depýtattary Úkimettiń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepterin qarap jatyr.
