«Ulttyq qor – balalarǵa!»: shotqa túsetin soma óse me

ASTANA. KAZINFORM – Úkimet basshysynyń orynbasary Tamara Dúısenova balalardyń shotyna túse bastaǵan 100 dollarǵa qatysty túsinik berdi.

«Ár balanyń shotyna 150 dollar túsedi dep kútilgen, nátıjesinde 100 dollardan tústi. Biz basynda balalar qoryna ınvestıtsııalyq kiristerdiń 50%-y degenbiz. Birinshiden, bul kiriske baılanysty, ekinshiden balalardyń sanyna qatysty. Allaǵa shúkir, týý kórsetkishi artyp keledi. Balalardyń shotyna aqsha aýdarýdyń esebin ótken jyly mamyrda Qarjy mınıstrligi jasady. Iá, ınflıatsııany esepke alǵanda bul soma az, biraq bala kámelet jasyna tolǵanda kiris aıtarlyqtaı bolady», - dedi Tamara Dúısenova Senat qabyrǵasynda BAQ ókilderiniń saýalyna jaýap bere turyp.

Sondaı-aq, vıtse-premer balalardyń shotyna qarjynyń jyl boıy úzbeı túsip turatynyn eske saldy.

«Eldegi basqa da áleýmettik aktıvterge súıene otyryp, Ulttyq bank zeınetaqy aktıvterine qatysty 2014 jyldan bastap úlken tabys ákeledi dep aıta alamyn. Eger Ulttyq bank Ulttyq qordy basqaratyn bolsa, onda jınaqtaý tıisti deńgeıde júredi dep kútemiz. Másele eldiń baılyǵyn barlyq sanattaǵy azamattar arasynda teńdeı bólý, birinshi bolyp biz balalardan bastadyq», - deıdi ol.

Buǵan deıin Tamara Dúısenova elimizde alıment qoryn qurý múmkindigin týraly aıtqan edi.

Odan bólek, Úkimet basshysynyń orynbasary qosylǵan qun salyǵy qaıta qaralyp jatqanyn habarlady.