«Ulttyq qor – balalarǵa»: paıdalanylmaǵan qarajat qaıda qalady
ASTANA. KAZINFORM — 2024 jylǵy 1 aqpannan 2026 jylǵy 1 qazanǵa deıin «Ulttyq qor – balalarǵa» baǵdarlamasy sheńberinde nysanaly jınaqtardy paıdalaný boıynsha jalpy somasy shamamen 88,86 mln AQSh dollaryna 407 145 alýshyǵa tólem jasaldy.
Onyń ishinde 267 986 alýshyǵa jalpy somasy 58,29 mln AQSh dollary turǵyn úı jaǵdaılaryn jaqsartýǵa, al 139 159 alýshyǵa 30,57 mln AQSh dollary bilim alýǵa aqy tóleý úshin aýdaryldy.
2026 jyldyń basynan bastap 1 qazandaǵy jaǵdaı boıynsha NJ tólemderin jalpy somasy 57,59 mln AQSh dollaryna 211 748 qazaqstandyq aldy. Bul rette 145 981 alýshyǵa turǵyn úı jaǵdaılaryn jaqsartý maqsatynda 38,86 mln AQSh dollarynan astam, al 65 767 alýshyǵa bilim berý aqysyn tóleýge 18,73 mln AQSh dollary aýdaryldy.
Qarajat ótinish berýshilerdiń banktik shottaryna esepteý úshin ýákiletti operatorlarǵa aýdaryldy. Eske salaıyq, NJ alýshy barlyq somany nemese onyń bir bóligin paıdalanýǵa quqyly. Eger qarajattyń bir bóligi talap etilmese, qaldyq nysanaly jınaqtaý shotynda (NJSh) 10 jyl boıy saqtalady. Odan keıin paıdalanylmaǵan qaldyq alýshynyń erikti zeınetaqy jarnalary esepke alynatyn jeke zeınetaqy shotyna aýdarylady.
Turǵyn úı jaǵdaılaryn jaqsartý baǵytynda eń kóp suranysqa ıe bolǵan maqsat — turǵyn úı qurylys jınaqtaryna odan ári jınaqtaý úshin salymdy tolyqtyrý. Osy maqsat boıynsha 144 160 alýshyǵa jalpy somasy 38,26 mln AQSh dollaryn quraıtyn tólemder júzege asyryldy. Sonymen qatar, turǵyn úı satyp alýǵa arnalǵan ıpotekalyq turǵyn úı qaryzyn alý úshin bastapqy jarna engizý maqsatynda 920 jas qazaqstandyqqa 221,38 myń AQSh dollary, al azamattyq-quqyqtyq mámileler boıynsha turǵyn úıdi menshikke satyp alý (túpkilikti esep aıyrysý) maqsatynda 531 qazaqstandyqqa 128,34 myń AQSh dollary tólendi.
Nysanaly jınaqtardy bilim alýǵa paıdalaný baǵytynda qarajattyń eń kóp kólemi Qazaqstan Respýblıkasynyń aýmaǵynda ornalasqan bilim berý uıymdarynyń bilim berý qyzmetterine aqy tóleýge baǵyttaldy. Tólemder árbir akademııalyq kezeń nemese oqý jyly úshin bólip-bólip nemese oqý merziminiń búkil kezeńi úshin birjolǵy tolyq kólemde júzege asyrylady. Osy baǵyt boıynsha 61 553 azamatqa jalpy somasy shamamen 17,58 mln AQSh dollaryn quraıtyn tólemder júrgizildi.
Basqalarmen qatar myna baǵyttar da suranysqa ıe boldy: bilim berý jınaqtaý salymy týraly shart boıynsha bilim berý jınaqtaý salymyn tolyqtyrýǵa 3 092 alýshyǵa jalpy somasy 810,23 myń AQSh dollary aýdaryldy. Al sheteldik bilim berý uıymdarynyń bilim berý qyzmetterine aqy tóleý úshin árbir akademııalyq kezeń nemese oqý jyly boıynsha bólip-bólip nemese oqý merziminiń búkil kezeńi úshin birjolǵy tolyq kólemde 1 015 azamatqa 266,29 myń AQSh dollary baǵyttaldy.
Eske salaıyq, nysanaly talaptardy esepteý nysanaly talaptarǵa qatysýshy qaıtys bolǵan nemese ony qaıtys boldy dep jarııalaý týraly sot sheshimi zańdy kúshine engen jaǵdaıda toqtatylady. Nysanaly talaptarǵa qatysýshynyń/nysanaly jınaqtardy alýshynyń qaıtys bolýyna baılanysty nysanaly talaptardy/nysanaly jınaqtardy alý úshin olardyń muragerleri Qazaqstan Respýblıkasynyń Úkimeti belgilegen tártippen BJZQ-ǵa júgine alady.
2026 jylǵy 1 qazandaǵy jaǵdaı boıynsha muragerlerge jalpy somasy 77,23 myń AQSh dollar bolatyn tólemder júzege asyryldy. Bul qarajatty 236 azamat aldy.
Nysanaly jınaqtardy turǵyn úı jaǵdaılaryn jaqsartý jáne (nemese) bilim alýǵa aqy tóleý maqsatynda tóleý týraly ýákiletti operatorlar men óńirler bólinisindegi tolyq aqparatpen enpf.kz saıtynda tanysýǵa bolady.
Esterińizge sala keteıik, 2025 jyldyń qorytyndysy boıynsha qazaqstandyq bir balaǵa 130,71 AQSh dollary kezekti esepteý júrgizildi. 2024 jyly – 129,38 AQSh dollary, 2023 jyly - 100,52 AQSh dollary mólsherinde qarajat aýdarylǵan bolatyn.
18 jasqa deıingi balalarǵa jyl saıyn Ulttyq qordan bólinetin somalar olardyń BJZQ-da ashylǵan shottarynda eskeriletin nysanaly talaptar túrinde esepteledi. Bul rette, zańnamaǵa sáıkes, jas qazaqstandyqtarǵa eseptelgen somalar Ulttyq qor aktıvteriniń quramynda qalady jáne ınvestıtsııalanýyn jalǵastyrady. Odan ári ınvestıtsııalaý nátıjesinde jyl saıyn árbir balanyń nysanaly talaptarynyń somasy alynǵan ınvestıtsııalyq tabys esebinen qosymsha ósedi.
Aıta ketelik «Ulttyq qor — balalarǵa»: 7 mln balanyń esepshotyna aqsha túskeni týraly jazǵan edik.
