«Ulttyq qor — balalarǵa» óskeleń urpaqtyń qaýipsiz bolashaǵyna qosylyp jatqan baǵa jetpes úles - Prezıdent
ASTANA. KAZINFORM – «Ulttyq qor — balalarǵa» baǵdarlamasy aıasynda 7 mıllıonnan astam balanyń jeke esepshotyna 2,5 mıllıard dollar aýdaryldy. Bul týraly III Strategııalyq seriktester forýmynda Memleket basshysy Qasym-Jomart Toqaev aıtty.
- Halyqaralyq valıýta qory usynǵan boljamǵa sáıkes, bıyl elimizdiń jalpy ishki ónimi 398 mıllıard dollar bolady. Al osydan jeti jyl buryn bul kórsetkish 181 mıllıard dollardyń shamasynda boldy. 2019 jyldan beri ekonomıkamyzǵa 155 mıllıard dollar shetel ınvestıtsııasy tartyldy. Elimizdiń syrtqy saýda kólemi 150 mıllıard dollarǵa jýyqtady, - dedi Qasym-Jomart Toqaev.
Memleket basshysynyń dereginshe, elimizdiń Altyn-valıýta rezervi men Ulttyq qor aktıvteriniń kólemi 44 paıyzǵa ulǵaıyp, 129 mıllıard dollardan asty. «Ulttyq qor — balalarǵa» baǵdarlamasy aıasynda 7 mıllıonnan astam balanyń jeke esepshotyna 2,5 mıllıard dollar aýdaryldy.
- Bul — qazirgi býyn ókilderiniń óskeleń urpaqtyń qaýipsiz bolashaǵyna qosyp jatqan baǵa jetpes úlesi desek, shyndyq bolaryna kúmán joq. Qazaqstanda aqysyz medıtsınalyq kómektiń kepildik berilgen kólemi naqty bekitilgen. Soǵan sáıkes azamattarymyzǵa 1 000-nan astam medıtsınalyq qyzmet kórsetildi. Elimizde áleýmettik jaǵynan osal toptaǵy adamdarǵa beriletin járdemaqynyń 39 túri bar, - dedi Prezıdent.
Qasym-Jomart Toqaevtyń málimetinshe, sońǵy 7 jylda elimizde 625 orta jáne iri óndiris orny ashyldy. 3 mıllıon 600 myń adam jumyspen qamtyldy. 118 mıllıon sharshy metr turǵyn úı boı kóterdi. 36 myń shaqyrym avtokólik joly jáne 5 myń shaqyrym temirjol salynyp, jóndeldi.