«Ulttyq qor – balalarǵa»: Keler jyldary esep shotqa túsetin qarajat ósedi

ASTANA. KAZINFORM – QR Qarjy vıtse-mınıstri Dáýren Temirbekov «Ulttyq qor – balalarǵa» jobasy aıasynda balalardyń shotyna aýdarylatyn qarajatqa qatysty túsinik berdi.

Búgin Senatta tilshiler vıtse-mınıstrden buǵan deıin 18 jasqa tolmaǵandarǵa 150-160 dollar túsetini aıtylǵanyn jáne nelikten qazir 100 dollardan túsip jatqanyn surady.

Óz kezeginde Qarjy vıtse-mınıstri Dáýren Temirbekov osyǵan deıingi esepteýler boıynsha 160 dollar túsýi tıis ekenin rastady.

«2022 jylǵy Prezıdent tıisti tapsyrma berdi. Sol ýaqyttaǵy esepteýge sáıkes, ol kezde balalardyń sany 6 mln 400 myń bolatyn. Qazir elimizdegi balalardyń sany 6 mln 900 myńnan asty. Bólinip jatqan qarajattyń somasy 695 mln dollarǵa jetti. Osy somany 6 mln 919 myń 131 balaǵa bólsek, sonda 100 dollar 52 tsent shyǵady. Keler jyldary bólinetin qarajat arta túsedi», - dedi D. Temirbekov.

Sonymen qatar vıtse-mınıstr 18 jyl ishinde balanyń esep shotynda 3,5 myń dollar jınalatynyn aıtty.

«Qazir túsip jatqan 100 dollarǵa ınvestıtsııalyq kiris qosylady. Bul qarajat esep shotta qur jatpaıdy. Al bıyl 18 jasqa tolatyn balalar 100 AQSh dollaryn búginnen bastap tıisti maqsatta paıdalana alady», - dedi ol.

Aıta ketsek, Biryńǵaı jınaqtaýshy zeınetaqy qory «Ulttyq qor — balalarǵa» jobasy boıynsha bala shotyna túsip jatqan soma týraly túsinik berdi.