«Ulttyq qor — balalarǵa»: qazaqstandyqtar 16,51 mln AQSh dollar jınaqty paıdalandy

ASTANA. KAZINFORM — Bıyl 1 tamyzdaǵy jaǵdaı boıynsha Biryńǵaı jınaqtaýshy zeınetaqy qory 16,51 mln AQSh dollarǵa 126 468 ótinishti oryndady.

Qor usynǵan málimetke súıensek, turǵyn úı jaǵdaıyn jaqsartý maqsatynda 10,56 mln AQSh dollaryna 78 862 ótinish, bilim alý aqysyn tóleý úshin 5,95 mln AQSh dollaryna 47 606 ótinish oryndaldy.

— Nysanaly jınaqty alýshy barlyq somany nemese onyń bir bóligin paıdalanýǵa quqyly, aqshanyń paıdalanylmaǵan qaldyǵy nysanaly jınaqtaý shotynda qala beredi. Qazaqstandyqtar qordaǵy qarjysyn kóbine turǵyn úı qurylysy jınaǵyndaǵy salymdy tolyqtyrýǵa, turǵyn úı satyp alýǵa ıpotekalyq turǵyn úı qaryzyn alý úshin bastapqy jarnany óteýge jáne jeke menshikke turǵyn úı satyp alýǵa (túpkilikti esep aıyrysý) jumsady, — delingen habarlamada.

Odan bólek, qor qarjysyn bilim alýǵa jumsaýǵa bolady. 

— Bilim alý aqysyn tóleý boıynsha qazaqstandyqtar kóbine el aýmaǵynda ornalasqan bilim uıymdarynyń bilim berý qyzmetine (árbir akademııalyq kezeń nemese oqý jyly úshin) nemese bir ret tolyq kólemde (búkil oqý merzimi úshin) aqy tóleý (5,29 mln AQSh dollaryna 41 870 ótinish oryndaldy), bilim alý úshin jınaqtaý salymy týraly shart boıynsha bilim alý jınaqtaý salymyn tolyqtyrý (475,14 myń AQSh dollaryna 4 163 ótinish oryndaldy), sheteldik bilim berý uıymdarynyń oqytý qyzmetine (árbir akademııalyq kezeń nemese oqý jyly úshin) nemese tolyq kólemde birjolǵy (búkil oqý merzimi úshin) aqy tóleýge jumsady (151,67 myń AQSh dollaryna 1 284 ótinish oryndaldy), — deıdi biryńǵaı jınaqtaýshy zeınetaqy qorynan.

Nysanaly jınaq tólemin turǵyn úı jaǵdaıyn jaqsartýǵa nemese bilim alý aqysyn tóleý maqsatynda paıdalaný boıynsha ýákiletti operatorlar men óńirler bólinisindegi tolyq aqparatpen enpf.kz saıtynda tanysýǵa bolady. 

— Nysanaly jınaq tólemin alý úshin alýshyǵa ne onyń zańdy ókiline BJZQ-men tıisti kelisim jasaǵan ýákiletti operatorǵa júginý qajet. Ótinishti «Otbasy banki» AQ, «Qazaqstan Halyq banki» AQ-nyń biriniń ınternet-resýrsy nemese mobıldi qosymshasy arqyly berýge bolady. 1 tamyzdan bastap atalǵan tizim «Bank TsentrKredıt» AQ ýákiletti operatorymen tolyqtyryldy, — degen habar taratyp otyr qor.

Eske sala ketsek, byltyr jeltoqsandaǵy jaǵdaı boıynsha jasóspirimder ulttyq qordaǵy 4,2 mln dollar jınaqty kádege jaratty.