«Ulttyq qor – balalarǵa»: Erteń ár balaǵa 129 dollar aýdarylady

ASTANA. KAZINFORM – Biryńǵaı jınaqtaýshy zeınetaqy qory «Ulttyq qor – balalarǵa» jobasy aıasynda bıyl ár balaǵa neshe teńge aýdarylatynyn eseptep boldy. Bul týraly Ulttyq bank tóraǵasy Tımýr Súleımenov agenttik tilshisine bergen suhbatynda málim etti.

- Byltyr 6 mln 918 myń bala «Ulttyq qor – balalarǵa» jobasynyń qatysýshysy boldy. Onyń árqaısysyna 100 dollardan sál asatyn aqsha aýdaryldy. Bıylǵy ınvestıtsııalyq tabys jaman emes. Ortasha (keıingi 18 jyldyń ortasha tabystylyǵy – red.) ınvestıtsııalyq tabystyń teń jartysy balalardyń shotyna aýdarylady. Bul jańalyqty qýana otyryp bólisemin. Óıtkeni, meniń de baǵdarlamaǵa qatysatyn balalarym bar. Bıyl 6 mln 921 myń 35 bala qatysady. BJZQ endi ǵana eseptep boldy. Ár balaǵa 129 dollar 38 tsentten aýdarylady, - dedi Tımýr Súleımenov.

Ulttyq bank málimeti boıynsha balalarǵa tıesili aqsha erteń aýdaryla bastaıdy. 

Qarajatty eGov mobile qosymshasy arqyly jáne kids.enpf.kz saıty arqyly baqylaýǵa bolady.

Eske salsaq, bıyl kóp jylǵa sozylǵan Statı isine núkte qoıylyp, Qazaqstannyń Ulttyq qoryna 80 mln dollar qaıtarylǵan bolatyn.