«Ulttyq qor – balalarǵa»: Bala qaıtys bolsa, jınalǵan qarajat muraǵa berile me

Bala 18 jasqa tolǵanǵa deıin qaıtys bolǵan jaǵdaıda Ulttyq qordyń tabysynan aýdarylǵan jınaǵy ata-anasyna beriledi ne baýyrlary arasynda bólinedi. Bul týraly Ulttyq ekonomıka mınıstri Álibek Qýantyrov aıtty, dep habarlaıdy Kazinform. 

Májilistiń jalpy otyrysynan keıin BAQ ókilderi mınıstrden: «Eger bala 18 jasqa tolǵanǵa deıin qaza tapsa, onda onyń qarajaty ata-anasyna ne baýyrlaryna muraǵa berile me?» dep suraǵan edi.

Mınıstrdiń atap ótýinshe, bastapqyda mundaı jaǵdaıda jınaqtalǵan qarajatty Ulttyq qorda qaldyrý josparlanǵan.

«Bastapqyda biz ázirlegen tujyrymdamada qarajatty Ulttyq qorǵa qaıtarý týraly norma bolǵan edi. Degenmen keıinnen biz aqsha ata-anasynda qalady nemese ózge balalarynyń arasynda bólinedi dep sheshtik», - dedi Álibek Qýantyrov.

Sonymen qatar ol Ulttyq qorda jınaqtalatyn qarjyny bala 18 jasqa tolǵannan keıin qalaı paıdalana alatynyn aıtty.

«Bul balanyń aqshasy jáne ol kámelettik jasqa tolǵannan keıin ony úı jaǵdaıyn jaqsartýǵa nemese bilim alýǵa jumsaı alady», - dedi mınıstr.