«Ulttyq qor – balalarǵa» baǵdarlamasyna bıylǵy 1 qańtarda 66 571 ótinim tústi

ASTANA. KAZINFORM – «Ulttyq qor balalarǵa» baǵdarlamasyna 2025 jyldyń 1 qańtarynda 66 571 ótinim tústi. Onyń ishinde jalpy somasy 5 316,7 myń dollarǵa 53 001 ótinim oryndaldy, dep habarlaıdy Qarjy mınıstrligi.

• Turǵyn úı jaǵdaıyn jaqsartýǵa 34 388 ótinim berildi, onyń ishinde 29 542-si oryndalyp, 2 964 myń dollary tólendi.
• Bilim berý boıynsha 32 183 ótinim joldanyp, onyń ishinde 23 459 ótinim qanaǵattandyrylyp, 2 352,7 myń dollar tólendi.

- Bıyl baǵdarlamaǵa 6 921 035 bala qatysyp jatyr (2007 jyldan 2024 jylǵa deıin týǵan balalar). Olardyń ishinde 324 430 azamat 2025 jyly 18 jasqa tolady, - delingen vedomstvo aqparatynda.

Ár balaǵa 129,38 dollar aýdaryldy. Aýdarymdar týraly aqparat eGov.kz portalynda jáne eGov Mobile mobıldi qosymshasynda 1 aqpanda kórsetiledi.

Tólem tetigi barynsha qarapaıym. Balanyń baǵdarlamaǵa qatysýy men eseptelgen aqsha týraly aqparatty balanyń JSN engize otyryp, arnaıy qurylǵan kids.enpf.kz saıtynan kórýge bolady. Onda baǵdarlamanyń sharttarymen tanysyp, nusqaýlyqtar, sol sekildi ózekti suraqtardyń jaýaptaryn ala alasyz. Budan bólek balaǵa arnalǵan aýdarymdar týraly derekterdi eGov.kz portalyndaǵy jeke kabınetke kirip, sondaı-aq Kaspi.kz, Halyk qosymshalary arqyly da kórýge bolady.

2024 jyly atalǵan baǵdarlamaǵa 6 919 131 adam qatysyp (2006-2023 j.j. týǵan balalardy qosa alǵanda), olardyń árbiriniń shotyna 100,52 dollar jiberildi. Aýdarylǵan aqshanyń jalpy somasy – 695,5 mln dollar. Tutastaı alǵanda, osy baǵdarlamamen qamtylǵandardyń jalpy sanynan 304 815 adam 2024 jyly 18 jasqa tolyp, olarǵa jalpy somasy 30,6 mln dollar aýdaryldy.

- Baǵdarlamaǵa eki jyldan beri qatysyp kele jatqan balalardyń (ınvestıtsııalyq kiristi qosa alǵanda) jınaqtarynyń jalpy somasy 232,94 dollarǵa ulǵaıdy, - delingen mınıstrlik málimetinde.

Jınaqtalǵan somany kez kelgen jas azamat 18 jasqa tolǵanda paıdalana alady. Jınaqtar BJZQ-daǵy shottarǵa aýdarylady jáne jobanyń resondentteri ýákiletti operatorlardyń (Otbasy banki jáne Halyq banki) qosymshasy arqyly ótinish bere otyryp, tıisti somany turǵyn úı jaǵdaılaryn jaqsartýǵa jáne (nemese) bilim alýǵa jumsaı alady.

- Ulttyq qordyń qarajatyn jas otandastarymyzdy qoldaý maqsatynda paıdalaný – elimizdiń ornyqty damýyna baǵyttalǵan strategııalyq sheshim. Atalǵan bastama ómir súrý sapasyn jaqsartýǵa oń áser etip, keıingi urpaqqa bolashaqqa zor senimmen qaraýǵa múmkindik beredi, - delingen habarlamada.

Osyǵan deıin 2024 jyly Ulttyq qorǵa 8,8 trln teńge kiris túsip, 5,6 trln teńge alynǵanyn týraly habarladyq.