«Ulttyq qor — balalarǵa»: 7 mln balanyń esepshotyna aqsha tústi
ASTANA. KAZINFORM — «Ulttyq qor — balalarǵa» baǵdarlamasy iske qosylǵaly 7 mıllıonǵa jýyq qazaqstandyq balanyń esepshotyna qarajat aýdaryldy. Memleket basshysy Qasym-Jomart Toqaev bul bastamany balalardy qoldaý baǵytyndaǵy elimizdiń mańyzdy jetistikteriniń biri dep atady.
Prezıdent balalardy qorǵaý jáne olardyń jan-jaqty damýy úshin qolaıly jaǵdaı jasaý — asa mańyzdy mindet ári memleket saıasatyndaǵy negizgi basymdyqtyń biri ekenin eske saldy.
— ıÝNISEF Qazaqstannyń osy salada Ortalyq Azııa elderine ǵana emes, Eýropadaǵy birqatar memleketke úlgi bola alatynyn málimdep otyr. Bul halyqaralyq uıymǵa rızashylyǵymdy bildiremin. Shyn máninde, biz bul baǵytta kóp jumys atqardyq. 2024 jyldan beri «Ulttyq qor — balalarǵa» baǵdarlamasy aıasynda 7 mıllıonǵa jýyq balanyń esepshotyna qarajat aýdaryldy, — dedi Q. Toqaev elordada respýblıkalyq Tamyz konferentsııasynda.
Onyń aıtýynsha, 2024 jyly — 695,5 mıllıon dollar, 2025 jyly — 888,8 mıllıon dollar, 2026 jyly — 901,7 mıllıon dollar qarajat aýdarylǵan.
— Bul jumys elimizdiń úlken jetistigi ekeni sózsiz. Kóptegen memleket balalarǵa arnalǵan osyndaı aýqymdy qoldaý saıasatyn júrgize almaı otyr, — dedi Memleket basshysy.
Jyl basynan beri elimizde «Qazaqstan balalary» tujyrymdamasy júzege asyryla bastady. Bul qujatta óskeleń urpaqty qoldaýǵa arnalǵan sharalardyń bári kórinis tapty.
Barlyq aımaqta balalardyń quqyqtaryn qorǵaý basqarmalary, sondaı-aq, psıhologııalyq qoldaý ortalyqtary quryldy. Buǵan qosa, ınklıýzıvti bilim berý júıesi qarqyndy damyp keledi.
— Biraq sheshimin tappaǵan túıtkilder de bar. Máselen, aqparattyń shamadan tys kóbeıip ketýi qoǵamǵa, sonyń ishinde jas urpaqqa keri áserin tıgize bastady. Mundaı ahýal azamattardyń jumys qabiletin tómendetedi. Bul, ásirese, bolmys-bitimi endi qalyptasyp kele jatqan balalar úshin óte qaýipti, — dedi Prezıdent.
Buǵan deıin Memleket basshysy mektepterge JI engizý tapsyrmasy tıisti deńgeıde oryndalmaǵanyn synaǵan edi.
Prezıdent balalar men pedagogterdiń JI-di durys ári júıeli qoldaný tártibin belgileıtin pármendi sharalardy shuǵyl qabyldaýdy tapsyrdy.
Sondaı-aq Prezıdent áleýmettik jelide bilim berý salasyna qatysty negizsiz daý-damaı men aıqaı-shýdyń kóbeıgenin synǵa aldy.
