«Ulttyq qor – balalarǵa»: 7 mln-ǵa jýyq balanyń bolashaǵyna aqsha aýdaryldy
ASTANA. KAZINFORM — Baǵdarlama resmı túrde 2024 jyldyń 1 qańtarynda bastaldy. Onyń sheńberinde 2006 jyldan bastap týylǵan árbir balaǵa Ulttyq qordan jyl saıyn qarajat aýdarý kózdelgen. Bul týraly Úkimettiń baspasóz qyzmeti habarlady.
Medıtsınalyq jáne áleýmettik qoldaý júıesin tolyqtyra otyryp, memleket bolashaq urpaq úshin qarjylyq turaqtylyqtyń uzaqmerzimdi tetikterin engizip jatyr. Mundaı tetik 2022 jylǵy 1 qyrkúıekte Prezıdent Qasym-Jomart Toqaevtyń «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda jarııalanǵan «Ulttyq qor — balalarǵa» jobasy boldy.
Jobany Úkimet Qarjy mınıstrligi arqyly iske asyrady jáne Ulttyq qordyń jyl saıynǵy ınvestıtsııalyq tabysynyń 50%-yn balalardyń 18 jasqa tolǵanǵa deıingi arnaıy jınaqtaýshy shottaryna merziminen buryn alý quqyǵynsyz aýdarýdy kózdeıdi. Jınaqtalǵan qarjyny turǵyn úı satyp alýǵa jáne bilim alýǵa paıdalanýǵa bolady.
Baǵdarlama resmı túrde 2024 jyldyń 1 qańtarynda bastaldy. Onyń sheńberinde 2006 jyldan bastap týylǵan árbir balaǵa Ulttyq qordan jyl saıyn qarajat aýdarý kózdelgen.
Qarjy mınıstrliginiń málimetinshe, ótken jyly baǵdarlamaǵa 6 919 131 adam — 2006 jyldan 2023 jylǵa deıin qosa alǵanda týylǵan balalar qatysty. Olardyń árqaısysyna $100,52 esepteldi.
Esepteýdiń jalpy somasy $695,5 mln-dy qurady. Ulttyq qordan aqsha eseptelgen balalardyń jalpy sanynan 2024 jyly 304 815 adam 18 jasqa jetti, olarǵa jalpy somasy $30,6 mln aýdaryldy.
2025 jyly qatysýshylar sany 6 921 035 balaǵa deıin ósti, onyń 324 430-y bıyl 18 jasqa tolady, al esepteýler $129,38 qurady.
Baǵdarlamaǵa eki jyldan beri qatysyp kele jatqan balalarda ınvestıtsııalyq kiristi qosa eseptegende, jınaqtardyń jalpy somasy — $232,94. Ulttyq qordan berilgen jalpy soma $1,5 mlrd-ty qurady.
Qarajat bala 18 jasqa tolǵanǵa deıin jınaqtalady, sodan keıin olardy turǵyn úı jaǵdaılaryn jaqsartýǵa nemese oqý aqysyn tóleýge paıdalanýǵa bolady. Osy maqsattarǵa 118 myńnan astam ótinim berildi, onyń 97 myńy oryndaldy. Jalpy somasy $11 mln 399,1 myń. Atap aıtqanda, turǵyn úı jaǵdaılaryn jaqsartýǵa 63 871 ótinim berildi, onyń ishinde 56 591 ótinim oryndaldy jáne $6, 647,9 mln tólendi. Oqý aqysyn tóleýge 54 270 ótinim berildi, onyń ishinde 40 466 ótinim oryndaldy jáne $4,751,2 mln tólendi.
Búgingi tańda «Ulttyq qor — balalarǵa» bastamasy árbir balanyń bolashaǵy úshin qarjylyq baza qurýǵa baǵyttalǵan uzaqmerzimdi memlekettik qoldaý nysany bolyp sanalady.
Aıta ketelik bıyl balaly otbasylardy áleýmettik qoldaýǵa 1,7 trln teńge bólindi.