Ulttyq qor – balalarǵa: 18-ge tolǵan shot ıesi baspana alý úshin aqshasyn qalaı sheshedi

ASTANA. KAZINFORM – Biryńǵaı jınaqtaýshy zeınetaqy qory basqarma tóraǵasynyń orynbasary Sáýle Egeýbaeva redaktsııa saýalyna joldaǵan jaýabynda «Ulttyq qor – balalarǵa» jobasynyń aqshasyn baspana alý úshin qalaı sheshýge bolatynyn túsindirdi.

«Baǵdarlamaǵa qatysýshy bala kámeletke tolǵan soń aqshasyn paıdalaný týraly sheshim qabyldasa, ol ýákiletti operatorǵa ótinish beredi. Al BJZQ onyń jınaqtaryn ýákiletti operatorda ashylǵan balanyń banktik shotyna AQSh dollarymen aýdarady. Ýákiletti operator jınaqtardy 18-ge tolǵan Qazaqstan azamatynyń turǵyn úı jaǵdaıyn jaqsartý nemese bilim alýyna sol sátte ózekti bolatyn valıýta baǵamy boıynsha teńgemen aýdarady», - delingen jaýapta.

Onyń aıtýynsha, bıyl 18-ge tolatyn balalardyń shotyna neshe dollardan aýdarylatyny áli belgisiz.

«Jeke tulǵalardyń memlekettik derekqorynan alynǵan málimetter boıynsha, 2024 jyldyń basyna Baǵdarlamaǵa qatysýshy retinde tirkelgen balalar sany - shamamen 7 mıllıon. Al, ár balanyń shotyna qanshalyqty mólsherde qarjy aýdarylatyny týraly máselege kelsek, ol Qazaqstan azamaty bolyp esepteletin balalardyń sany boıynsha derekterge (2023 jylǵy 31 jeltoqsannyń sońyndaǵy jaǵdaı boıynsha) jáne Ulttyq qorda eseptelgen balalarǵa arnalǵan nysanaly talaptardyń jalpy somasyna qatysty Ulttyq Bankten alynǵan aqparatqa negizdele otyryp esepteledi. Nysanaly talaptardyń (18 jasqa deıingi balalar úshin) jáne nysanaly jınaqtardyń (18 jasqa 2024 jyly tolatyn balalar úshin) eseptelgen somalary týraly málimetter barlyq esepteý men tekserý rásimderi aıaqtalǵannan keıin, 2024 jylǵy aqpan aıynda qoljetimdi bolady. Olardy BJZQ jáne eGOV resmı saıttarynan derbes (balanyń derekteri boıynsha) kóre alasyzdar», - dep jazady S.Egeýbaeva.