Ulttyq qor aýdıti: 500 joba aıaqsyz qalǵan, 64 mlrd teńgeniń izi kúmándi
ASTANA. KAZINFORM – Joǵary aýdıtorlyq palatanyń tóraǵasy Álıhan Smaıylovtyń qatysýymen ótken komıssııa otyrysynda Ulttyq qor qarajatynyń maqsatqa saı ári tıimdi paıdalanylýyna júrgizilgen tekseris qorytyndysy qaraldy.
Tekserý nysanaly transfert esebinen 3,4 trln teńgege qarjylandyrylǵan 3 myńnan astam jobany, sondaı-aq kvazımemlekettik sektorǵa berilgen 3,8 trln teńge oblıgatsııalyq qaryzdy qamtyǵan.
Álıhan Smaıylovtyń aıtýynsha, Ulttyq qor esebinen nátıjeli jobalarmen birge bazalyq daıyndyǵy jetkiliksiz jobalar da qarjylandyrylǵan. Keıbirinde jobalaý-smetalyq qujattamasy, keıbirinde jer telimderi bolmaǵan. Saldarynan 394 mlrd teńgeniń 500-den astam jobasy toqtatylǵan nemese basqa jobalarmen aýystyrylǵan.
Palatanyń málimetine súıensek, Ulttyq qor qarajatynyń bir bóligi basqa kózden qarjy tartý múmkindigi bar jergilikti deńgeıdegi áleýmettik jobalarǵa baǵyttalyp ketken.
Keı jaǵdaıda qarajat aıaqtalyp qoıǵan jobalarǵa nemese naqty qajettilikten joǵary kólemde bólingen. Keıde tipti aýyldaǵy medıtsınalyq ınfraqurylymǵa arnalǵan qarjy qalalyq nysandarǵa baǵyttalǵan. Al keı óńirlerde jabdyq satyp alý kólemi jospardan eki esege deıin asyp ketken.
Revızııa oblıgatsııalyq qarjylandyrýdy baqylaý tetikteri jetkiliksiz ekenin kórsetken. Sonyń saldarynan qaıtarymy tómen jobalardy qarjylandyrý, jeńildikti qaryzdardy maqsattan tys paıdalaný jaǵdaılary tirkelgen.
- 2023-2024 jyldary Ulttyq qordan bólingen qarajattyń ıgerilýine júrgizilgen tekserý nátıjesinde birqatar qylmystyq is tirkelgen. Jumys toby nysanaly transfertterdi tek tolyq daıyndyqtan ótken jobalarǵa bólý, qarajattyń sońǵy alýshyǵa deıingi qozǵalysyn baqylaý jáne maqsatyna saı paıdalanylmaǵan 64 mlrd teńgeni qaıtarý boıynsha usynystar engizdi, - dep jazylǵan resmı aqparatta.
Palatanyń málimeti boıynsha, kvazımemlekettik sektor sýbektilerine berilgen oblıgatsııalyq qaryzdardy merziminen buryn qaıtarý máselesi deqarastyrylyp jatyr.
Aýdıtorlar Ulttyq qorǵa jaýapty biryńǵaı organnyń joqtyǵyn da júıeli másele retinde atady. Bul qarajattyń tıimdiligin tolyq baǵalaýǵa múmkindik bermeı otyrsa kerek.
Buǵan deıin Ulttyq qordyń aqshasy 1 jyldyń ishinde eki ret ortaıyp, qaıta óskenin jazǵan edik.
