Ulttyq qor aktsııalar esebinen 500 mlrd teńgege tolyqty

ASTANA. KAZINFORM – Ulttyq qor QazMunaıGaz jáne Qazatomónerkásip kompanııalardyń aktsııalaryn satyp alý esebinen 500 mlrd teńgeden asa tabys tapty. Bul týraly Ulttyq bank tóraǵasy Tımýr Súleımenov málim etti.

Onyń aıtýynsha, 2023 jyly Ulttyq qor qarajaty esebinen 1,3 trln teńgege QazMunaıGaz aktsııalary satyp alynǵan.

«Bul fıskaldyq máselelermen baılanysty boldy. Degenmen, bul ınvestıtsııa ekenin atap ótkim keledi. Biz 1,3 trln teńge ınvestıtsııa saldyq, qazir bul pakettiń quny shamamen 1,7 trln teńge. Bul Ulttyq qorǵa shamamen 400 mlrd teńge qosymsha tabys ákeldi, jaman kórsetkish emes», - dedi Tımýr Súleımenov Májilistiń jalpy otyrysy barysynda.

Odan bólek, bıyl shildede Ulttyq qor 467 mlrd teńgege Qazatomónerkásip kompanııasynyń aktsııasyn satyp alǵan.

«Qazatomónerkásip kompanııasy da jaqsy jumys isteıdi, onyń aktsııalary baǵalanady. Qazir bul ınvestıtsııa 600 mlrd teńgege taıady. Bálkim, bul turaqty qural emes, ony paıdalanýdyń qajeti joq, soǵan qaramastan aktsııalar boıynsha jasalǵan osy eki ınvestıtsııa Ulttyq qorǵa tabys ákeldi. Biraq, júıeli qural retinde qoldanýdyń qajeti joq, bul turǵyda depýtattarmen kelisemin», - deıdi ol.

Qazanda Úkimet Ulttyq qor aktıvterin 100 mlrd dollarǵa ulǵaıtý josparymen bólisken edi.