Ulttyq qor aktıvteri 64,6 mlrd dollarǵa jetti – Ulttyq bank
ASTANA. KAZINFORM – Senat kýlýarynda Álııa Moldabekova Ulttyq banktiń Ulttyq qordan qarajat alý kóleminiń qysqarýy jáne qor aktıvteriniń ósýi týraly málimdedi.
Ulttyq bank tóraǵasynyń orynbasary Álııa Moldabekova ótken jyldardaǵy qarajat alýdyń qor tabystylyǵyna áseri týraly aıtyp berdi. Onyń aıtýynsha, 2025 jyldyń qorytyndysy boıynsha Ulttyq qordyń tabystylyǵy rekordtyq deńgeıge jetip, 8,7 mlrd dollar boldy.
- Ótken jyly transfertter kólemi aıtarlyqtaı joǵary bolǵanyna qaramastan, qor kólemi ósti. Eger 2024 jyldyń sońynda ol 58,8 mlrd dollar bolsa, 2025 jyldyń sońynda 63,9 mlrd dollarǵa jetti. Qazirgi tańda Ulttyq qordyń naryqtyq quny 64,6 mlrd dollar bolyp otyr, – dedi ol.
Jýrnalısterdiń Ulttyq qor qarajatyn paıdalanýǵa qosymsha shekteýler engizý jospary bar ma degen suraǵyna jaýap bergen Álııa Moldabekova transfertter qazirdiń ózinde kontrtsıkldik bıýdjettik ereje arqyly shektelgenin atap ótti.
- Kepildendirilgen transfert munaıdyń óte konservatıvti baǵasyna negizdelgen bıýdjettik erejemen qatań shektelgen. Al nysanaly transfert memlekettik shyǵystar boıynsha belgilengen shekti deńgeımen shekteledi, – dedi ol.
Onyń málimetinshe, 2025 jyly jalpy transfertter kólemi (kepildendirilgen jáne nysanaly) 5,2 trln teńgeden asqan. Al 2026 jyly bul kórsetkish shamamen 2,2 trln teńge deńgeıinde belgilengen.
- Bul – aıtarlyqtaı qysqarý. Sebebi bıyl nysanaly transfertter josparlanbaǵan, tek kepildendirilgen transfertter qarastyrylǵan. Bul Ulttyq qordan qarajatty az kólemde alýǵa múmkindik beredi. Al Ulttyq bank basqarýshy retinde qordy tıimdi basqarý jáne ony ulǵaıtý máselelerine kóbirek kóńil bóle alady, – dep túsindirdi spıker.
Aıta keteıik, Qazaqstan Ulttyq qordan bólinetin transfertterden tolyq bas tartýdy ázirge josparlap otyrǵan joq.
