Ulttyq kompanııalardyń memleketke tóleıtin dıvıdendi nege azaıtyldy — Premer jaýaby

ASTANA. KAZINFORM — Premer-mınıstr Oljas Bektenov Májilis depýtatynyń suraǵyna jaýap bere otyryp «Samuryq-Qazyna» bastaǵan ulttyq kompanııalardyń memleketke aýdaratyn dıvıdendteri nege azaıyp ketkenin túsindirdi.

Depýtattyń mundaı suraq qoıýyna bıyl qabyldanǵan sheshim túrtki bolyp otyr. Jańa Bıýdjet kodeksinde «Samuryq-Qazyna» ulttyq ál-aýqat qory ózine enshiles ulttyq kompanııalardan túsken dıvıdendterdiń keminde 50 paıyzyn memleketke aýdarý kerektigi kórsetilgen. Bir qyzyǵy, qordyń aldaǵy úsh jylda memleketke aýdaratyn dıvıdendi osy sheshim qabyldaǵanǵa deıin aýdaryp kelgen aqshasynan az bolǵaly tur. Oljas Bektenov Úkimet qordyń búkil qarjy operatsııasyn baqylap otyrǵanyn, sondyqtan bul tendentsııaǵa alańdamaýǵa bolatynyn aıtty.

— Ulttyq kompanııalar jumsaıtyn, ıaǵnı ekonomıkaǵa quıylatyn qarajattyń ashyqtyǵy týraly másele barlyq jaǵynan zańnamamen qamtamasyz etilgen dep oılaımyz. Ózderińiz biletindeı, bıyl qabyldanǵan jańa Bıýdjet kodeksine dıvıdend tóleýden alynatyn úles árbir ulttyq kompanııadan keminde 50 jáne 70%-ǵa deıin bolýy tıis degen norma engizilgen. Buryn bul norma joq edi. Bul shektik meje Úkimettiń qaýlysymen belgilendi. Biz muny ashyqtyqqa, esep berýge, ulttyq kompanııalardyń qarajatyn jumsaýǵa Parlament tarapynan qadaǵalaýdy arttyrýǵa jasalǵan eleýli qadam dep sanaımyz, — deıdi ol.

Úkimet basshysy ulttyq kompanııalardyń ıeliginde qalatyn qarajattar ashyq túrde jumsalatynyna senimdi ekenin aıtady. 

— Siz aıtyp otyrǵan naqty somalarǵa kelsek, shyn máninde, bul soma — memlekettik bıýdjetke túsetin dıvıdendterdegi aıyrmashylyq, ol «Samuryq-Qazyna» qory esebinen qalyptasyp otyr. Men bul rette birqatar tsıfr keltirgim keledi. Qor, negizgi memlekettik damý ınstıtýty retinde, 53 trln teńgege baǵalanatyn óte aýqymdy ınvestıtsııalyq baǵdarlamany júzege asyrýda. Bul úlken soma. Árıne, Qor osy ınvestıtsııalyq baǵdarlamany júzege asyrý úshin óz qarajatyn jumsap qana qoımaı, naryqtan da qaryz alýǵa májbúr, bul qalypty jaǵdaı dep sanaımyz, — dedi Oljas Bektenov.

Onyń paıymdaýynsha, «Samuryq-Qazyna» ózindegi aqshany ınvestıtsııalyq baǵdarlamadan bólek áleýmettik jobalarǵa jumsap jatyr. Basqasha aıtsaq, tabysynyń bir bóligi bıýdjetke tikeleı túspegenimen, áleýmettik jobalar arqyly el ıgiligine jarap jatyr.

— Mysaly, óńirlerde tek densaýlyq saqtaý nysandaryn salýdyń ózine 550 mlrd teńge baǵyttalyp otyr, al elimizdiń barlyq óńirinde jalǵa beriletin turǵyn úı qurylysyna 272 mlrd teńge bólingen. Bul degenimiz — óte mańyzdy ınvestıtsııalar, sondyqtan da men aıtqan faktorlardy eskere otyryp, «Samuryq-Qazyna» qorynyń dıvıdendteri boıynsha qabyldanǵan sheshimder bir negizge súıengen jáne jan-jaqty qarastyrylǵan dep esepteımiz, — dedi Premer-mınıstr.

Eske salaıyq, búgin Májilistiń jalpy otyrysynda 2026-2028 jyldarǵa arnalǵan respýblıkalyq bıýdjet jobasyn qabyldandy.