Ulttyq kompanııa atyn jamylǵan alaıaqtar kóbeıdi

ASTANA. KAZINFORM — Áleýmettik jelilerde, messendjerlerde jáne jarnamalyq habarlandyrýlar arqyly qazaqstandyqtardy «Qazatomónerkásip» UAK AQ atynan jasalǵandaı kórinetin jalǵan «ınvestıtsııalarǵa» tartý áreketteri jıilep ketti.

Abaı oblysy Polıtsııa departamentiniń derekteri boıynsha, qaskóıler «jyldam tabys», «kepildendirilgen paıda» ýáde etip, «platformaǵa» tirkelýdi usynady. Keıin azamattardyń jeke derekterin, bank málimetterin jáne aqshasyn aldap alady.

Kompanııanyń resmı aqparatynda «Qazatomónerkásip» atynan qandaı da bir «ınvestıtsııalyq platformanyń» iske qosylǵany týraly málimettiń jalǵan ekeni birneshe ret aıtylǵan.

Sondaı-aq alaıaqtar fıshıngtik taralymdardy, jalǵan saıttardy jáne basshylyq pen qyzmetkerlerdiń atynan jasalǵan jalǵan vıdeolardy paıdalanyp, ózin resmı aqparat sııaqty kórsetýge tyrysady. 

Alaıaqtyq shema qalaı jumys isteıdi?

• Azamattardy jarnama, post nemese habarlamadaǵy tirkeý siltemesi arqyly «qyzyqtyrady»;

• Keıin «menedjerler» baılanysqa shyǵyp, telefon nómirin, JSN-dy, bank kartasynyń derekterin suraıdy nemese «shotty toltyrýdy» talap etedi;

• Keı jaǵdaıda SMS-kodtardy aıtýǵa nemese «verıfıkatsııadan ótýge» kóndirip, nátıjesinde qarajatty esepshottan sheship alady. 

Polıtsııa eskertedi

• Kúmándi siltemelerge ótpeńiz jáne belgisiz saıttarǵa jeke derekterińizdi engizbeńiz;

• Eshkimge SMS-kodtardy, CVV, qupııasózderdi jáne bank qosymshalaryna qatysty málimetterdi habarlamańyz;

• Aqparatty tek kompanııanyń jáne memlekettik organdardyń resmı derekkózderi arqyly tekserińiz.

— Eger siz aqsha aýdaryp qoısańyz nemese derekterdi berip qoıǵan bolsańyz, dereý óz bankińizge habarlasyńyz (kartany/qoljetimdilikti buǵattańyz), hat-habarlardy, telefon nómirlerin, siltemelerdi jáne skrınshottardy saqtańyz. Osydan keıin 102 nómiri arqyly polıtsııaǵa júginińiz, — delingen habarlamada.

Abaı oblysy Polıtsııa departamenti azamattardy «jeńil aqsha» týraly ýádelerge aldanbaýǵa jáne alaıaqtyq shemalar týraly jaqyndaryn, ásirese egde jastaǵy adamdardy, mindetti túrde aldyn ala eskertýge shaqyrady.

Osydan buryn Shymkentte halyqaralyq izdeýde bolǵan alaıaq áıel ustalǵany belgili boldy.