Ulttyq komıssııa sarapshylary áıelder men qyzdardyń reprodýktıvti densaýlyǵynyń ózekti máselelerin talqylady
ASTANA. KAZINFORM - Búgin QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysynda jasóspirim qyzdarǵa medıtsınalyq qyzmet kórsetý jáne fertıldi jastaǵy áıeldermen akýsherlik-gınekologııalyq qyzmettiń jumysy máseleleri qaraldy. Erekshe nazarda - aýyldyq eldi mekenderdiń turǵyndary.
Otyrysqa oblys ákimderiniń orynbasarlary, ortalyq memlekettik organdardyń ókilderi qatysty.
Otyrysqa qatysýshylar aldynda sóılegen sózinde Ulttyq komıssııa tóraǵasy Aıda Balaeva halyqtyń reprodýktıvti densaýlyǵyn qorǵaý memlekettik saıasattyń basym baǵyty bolyp qala beretinin atap ótti.
«Bul másele jalpyulttyq mańyzǵa ıe, óıtkeni biz salaýatty ult, eldiń bolashaǵy týraly aıtyp otyrmyz.
Jasóspirim qyzdar men fertıldi jastaǵy áıelderdiń reprodýktıvti densaýlyǵyn saqtaý jáne nyǵaıtý, olardyń bala týý týraly aqparattandyrylǵan sheshim qabyldaý múmkindigin keńeıtý, júktilik jáne bosaný kezindegi táýekelderdi azaıtý maqsatynda áleýmettik-ekonomıkalyq jáne emdeý-profılaktıkalyq sharalar kesheni iske asyrylýda.
Bizdiń sarapshylar medıtsınalyq ınfraqurylymnyń úzdiksiz jumysyn qamtamasyz etý, ana ólimin azaıtýǵa múmkindik beretin sharalar keshenin qabyldaý qajettigin atap ótti. Jalpy, barlyq ýákiletti organdardyń belsendi dáıekti jumysy qajet dep sanaımyn», - dep atap ótti mınıstr.
Densaýlyq saqtaý vıtse-mınıstri Aıjan Esmaǵambetova osy saladaǵy aǵymdaǵy jaǵdaı men jumys júıesin jetildirý sharalary týraly habardar etti.
Senator Lázzat Qaltaeva otyrysqa qatysýshylardyń nazaryn múgedektigi bar áıelderge medıtsınalyq qyzmet kórsetýdiń problemalyq máselelerine aýdardy.
Ulttyq komıssııanyń múshesi, qoǵam qaıratkeri Toǵjan Qojaly shalǵaıdaǵy aýyldardaǵy áıelderge kómek kórsetetin akýsherlik-gınekologııalyq qyzmet jumysyndaǵy birqatar problemalardy atap ótti.
Óńirlerdegi aýyldyq aýrýhanalarǵa, feldsherlik pýnktterge baryp osy máselelerdi egjeı-tegjeıli zerdelegen Ulttyq komıssııa sarapshylary densaýlyq saqtaý menedjerlerimen, dárigerlermen jáne patsıenttermen kezdesýler barysynda áıelderdiń reprodýktıvti densaýlyǵyn qorǵaý úshin ınfraqurylymnyń úzdiksiz jumys isteý máselesine nazar aýdardy.
Áıelder konsýltatsııalaryna, perzenthanalarǵa, otbasyn josparlaý kabınetterine, aýyldyq aýrýhanalarǵa, jastar densaýlyq ortalyqtaryna ádistemelik kómek kórsetý qajettiligi bar.
Otbasyn josparlaý kabınetteriniń jetkilikti sanyna qaramastan, júktiliktiń 40%-y josparlanbaǵan, al pregravıdarlyq daıyndyqtan ótken juptardyń úlesi 30%-dan aspaıdy. Osy turǵyda atalǵan jumysty uıymdastyrýdyń tásilderin qaıta qaraý usynyldy.
Azamattardyń óz densaýlyǵyn saqtaý jáne nyǵaıtý úshin birlesken jaýapkershiligi tómen bolýy osy protseske barlyq ýákiletti organdardy qosýdy talap etedi. Qoǵamdyq uıymdar, saraptamalyq jáne ǵylymı qoǵamdastyq halyq arasynda, maqsatty aýdıtorııalar arasynda túsindirý jumystaryn júrgizýi tıis.
Otyrysty qorytyndylaı kele, Ulttyq komıssııa tóraǵasy Densaýlyq saqtaý mınıstrliginiń jergilikti atqarýshy organdarmen, oqý-aǵartý, ǵylym jáne joǵary bilim mınıstrlikterimen birlesip fertıldi jastaǵy qyzdar men áıelderdiń densaýlyǵyn saqtaý, jasóspirimderdiń reprodýktıvti densaýlyǵyn nyǵaıtý, sondaı-aq jastardy sanaly ata-ana bolýǵa daıyndaý jóninde sharalar keshenin qabyldaý qajettigin atap ótti.
Ulttyq komıssııa jasóspirim qyzdarǵa medıtsınalyq qyzmet kórsetýdiń jáne akýsherlik-gınekologııalyq qyzmettiń óńirlik deńgeıde fertıldi jastaǵy áıeldermen jumysynyń egjeı-tegjeıli monıtorıngin jalǵastyrady.
