Ulttyq kınony qoldaý ortalyǵynyń pıtchıngine 99 joba qatysyp jatyr
ASTANA. KAZINFORM – Almaty qalasynda 9-12 maýsym aralyǵynda kınojobalardy ashyq qorǵaý ótip jatyr. Pıtchıngke Ulttyq kınony qoldaý memlekettik ortalyǵynyń eki kezeń boıynsha irikteýinen sátti ótken 99 joba qatysyp otyr. Bul týraly Mádenıet jáne aqparat mınıstrligi málim etti.
Barlyq protsess Kıno ortalyǵynyń resmı YouTube arnasynda tikeleı efırde kórsetilip jatyr.
Ulttyq kınony qoldaý memlekettik ortalyǵynyń Basqarma tóraǵasy Qurmanbek Jumaǵalıdiń aıtýynsha, memleket qarjysyna túsiriletin fılmderdiń mazmuny men sapasy joǵary deńgeıde bolýy tıis.
Esterińizge sala keteıik, konkýrsqa ótinim qabyldaý 13 naýryzda aıaqtaldy. Bıyl kórkem, derekti jáne anımatsııalyq fılm sektsııalarynda barlyǵy 444 ótinim kelip tústi. Onyń ishinde 357 joba Saraptama keńesiniń qaraýyna jiberildi. Baǵalaý nátıjesinde 128 stsenarıı men stsenarıı jospary ekinshi kezeńge ótti.
— Qujattardyń tolyq paketin tapsyrǵan soń 99 joba pıtchıngke joldama aldy. Saraptama keńesi jobalardy baǵalaý barysynda birqatar negizgi krıterıılerge nazar aýdardy. Atap aıtsaq, bekitilgen basym taqyryptarǵa saı bolý, stsenarıdiń tujyrymdamalyq deńgeıi, sıýjet dınamıkasy men dramatýrgııalyq qurylymy, tehnıkalyq mazmuny jáne keıipkerler beınesiniń tereń ashylýy eskeriletin bolady, — delingen habarlamada.
Saraptama keńesi iriktegen jobalarǵa memlekettik qarjylaı qoldaý kórsetiledi jáne týyndy ulttyq fılm mártebesine ıe bolady.
Aıta keteıik, bıyl 10 jańa fılm prokatqa shyǵatynyn jazǵan edik.