Ulttyq kıimdegi ár órnek, ár oıý jurtymyzdyń ádep-ǵurpynyń aınasy — óskemendik tiginshi

Qyzyǵýshylyǵyn kásipke aınaldyrdy

Áıgerim Jaqııarova eń alǵash ájesiniń eski tigin mashınasymen perdeni qysqartyp kórgen. Qolynan keletinin sezip, sodan tiginshilikke qyzyǵýshylyǵy aýypty. 

— Sońǵy jyldary ulttyq naqyshtaǵy kıimder el arasynda úlken suranysqa ıe bola bastaǵandyqtan, kúndelikti obrazdarmen jáne keshki kóılektermen de úılesip turatyn ýnıversaldy qazaqı qajekeı tikkim keldi. Tek Naýryz meıramynda ǵana emes kúndelikti kıip júrsek eken degen nıetimmen qyzyǵýshylyǵym ashylyp, basqa da ıdeıalar qosylyp, ártúrli stılde qajekeıler tige bastadym, — deıdi ol.

Jeke hobbıi birte-birte tabys kózine aınalǵan. Tikken kıimderin áleýmettik jeli arqyly saýdalap, tapsyrystar udaıy túse bastaǵan. Keıipkerimiz óz sózinde bir kıimdi tigý protsesi qalaı ótetindigin aıtyp berdi.

— Eń áýeli mata tańdap alamyn. Sosyn sáıkes jip taýyp, matany óńdeımin. Útiktep, qajet bolsa jýyp, dýblerındaý qajet. Odan soń lekalosyn daıyndap, piship, kóktep, mashınkamen tigip, ár tigisin útikteımin. Aıtyp otyrǵanym, tek bazalyq jumys qana. Negizinen barlyǵy matanyń túrine baılanysty ǵoı, — deıdi tiginshi.

Jumysqa kiriskende birinshi qajekeıdi tigip kóredi. Sebebi tigip bolǵan soń daıyn ónimge syzatyn oıýdy tańdaý ońaıyraq bolady. Ol talǵam men shyǵarmashylyqqa baılanysty keledi.

— Kejýal, strıt staıldarmen kıip, jeńil, ádemi qylyp, ártúrli stıldegi kıimdermen úılestire kórsetý arqyly jastardy ulttyq kıimge qyzyqtyra alamyz ba dep oılaımyn. Sebebi ulttyq kıim — ata-babamyzdan qalǵan, halyqtyń tarıhyn, mádenıetin kórsetetin mura. Sondyqtan ony óskeleń urpaqqa nasıhattaı berýimiz kerek. Ulttyq kıimdegi ár órnek, ár oıý, tipti tústerdiń úılesimi jurtymyzdyń ádep-ǵurpy men rýhanııatynyń aınasy, — deıdi Áıgerim Jaqııarova. 

Ata dástúrdi dáripteıtin kún

Onyń tikken kıimderi ishinen qazirgi tańda qajekeılerge, «Mamasy men qyzy» atty tusaýkeserge arnalǵan ekeýlikterge suranys joǵary. 

— Tapsyryspen tikkende klıentimniń jeke talǵamyna, usynystaryna basa mán beremin. Sondyqtan bolar, árqashan jaqsy pikirlerimen qýantyp jatady. Mamasy men qyzyna arnalǵan ekeýlikterim este qalarlyqtaı bolyp shyǵyp jatyr degen oıdamyn, — deıdi tiginshi.

Sóz sońynda ol Naýryznama onkúndigi aıasyndaǵy Ulttyq kıim kúni barshamyzdy birlikke, rýhanı jańǵyrýǵa, ata dástúrdi dáripteýge úndeıtinin tilge tıek etti.

— Tek Naýryzda ǵana emes, basqa kúnderde de ulttyq kıim kıip, tól mádenıetimizdi birge nasıhattaıyq! Sonda tereń tarıhymyz ben baı dástúrimiz máńgi óshpeıdi. Áz Naýryz qutty bolsyn! Elimiz aman, jurtymyz tynysh, aspanymyz árqashan ashyq bolǵaı! — deıdi Áıgerim Jaqııarova.

Eske salsaq, osyǵan deıin Gonkongtaǵy qazaqtar ulttyq merekeni toılaǵany jaıly jazǵanbyz.