Ulttyq kıimdi sánge aınaldyrý maqsatynda arnaıy jumys toby quryldy

ASTANA. KAZINFORM — Qazaqstanda ulttyq kıim úlgisin qoǵamǵa engizý jáne jastar arasynda sánge aınaldyrý boıynsha arnaıy jumys toby usynystar ázirlep jatyr. Bul týraly Mádenıet jáne aqparat mınıstrliginiń agenttik joldaǵan saýalǵa jaýabynda aıtylǵan.

— Ulttyq kıimderdi dáripteý men jańǵyrtý elimizdiń mádenı qundylyqtaryn saqtap, jastardyń ulttyq bolmysty tanýyna jol ashý baǵytynda mańyzdy. Osy maqsatta birneshe bastama qolǵa alyndy. Memleket basshysy Qasym-Jomart Toqaevtyń 2024 jylǵy 15 naýryzda Atyraý qalasynda ótken ulttyq quryltaıda bergen hattamalyq tapsyrmasynyń 3.7-tarmaǵyna sáıkes ulttyq stıldegi kıim kııý tájirıbesin ilgeriletý jáne tanymal etý jóninde tapsyrma berildi. Atalǵan tapsyrma aıasynda ulttyq kıim úlgisin qoǵam ómirine engizý jáne jastar arasynda sánge aınaldyrý boıynsha usynystar ázirleý úshin eýrazııalyq dızaınerler odaǵynyń tóraǵasy Ermek Asylhanov, tanymal dızaıner Qaırolla Ábishev, etno-dızaınerler odaǵynyń tóraǵasy K. Kódekov taǵy basqa belgili dızaınerler qatarynan arnaıy jumys toby quryldy. Óz kezeginde jumys toby mádenıet, bilim berý jáne sol sııaqty áleýmettik sala qyzmetkerleri úshin ulttyq kolorıt pen oıý-órnek elementteri bar kostıýmderdiń eskızin ázirlep, múddeli memlekettik organdarǵa usynys retinde joldady, — dep jaýap berdi Mádenıet jáne aqparat vıtse-mınıstri Qanat Ysqaqov. 

Onyń aıtýynsha, búginde el aýmaǵynda ulttyq kıim kııý praktıkasy júıeli jolǵa qoıylǵan.

— Ótken jyldan beri Memleket basshysynyń tapsyrmasymen Naýryz meıramynyń onkúndigi tujyrymdamasy aıasynda «Ulttyq kıim» kúni dep jarııalanyp, elimizdegi memlekettik organdar men uıymdar qoldaý bildirip keledi. Birqatar memlekettik organ men kásiporyn aptanyń belgili bir kúni, joǵary oqý oryndarda ár beısenbi ulttyq kıim kúni bolyp jarııalanyp, qyzmetkerler men bilim alýshylar ulttyq kıim kıip kelý dástúrin qolǵa alǵan. Bul bastama ulttyq biregeılikti saqtaýǵa jáne kúndelikti ómirde ulttyq qundylyqtardy jańǵyrtýǵa baǵyttalyp otyr. Otandyq dızaınerler men sán úıleri ulttyq elementterdi zamanaýı sánmen úılestirip, jańa toptamalar shyǵaryp jatyr. Bul kıimder túrli sán aptalyqtarynda kórsetilip, ulttyq kıimdi jańa turǵydan qaıta tanýǵa múmkindik berip keledi. Máselen, Astana qalasy men Pavlodar jáne Aqtóbe oblystarynda 2023 jyldan beri «Taqııa-fest» festıvali turaqty ótkizilip keledi. Áleýmettik jeliler men aqparat quraldarynda ulttyq kıim týraly beınerolıkter, tanymdyq maqalalar men fotojobalar jarııalanyp, ulttyq kıim jaıly aqparat keń aýdıtorııaǵa nasıhattalyp jatyr. Bul baǵyttaǵy jumystar ári qaraı jalǵasady, — deıdi ol.

Bıyl «Naýryznama» onkúndigi aıasynda «18 naýryz — ulttyq kıim kúni» elimizdiń barlyq aýmaǵynda ulttyq kıimder sherýi ótti.

— Atap aıtqanda, Aqtaý qalasynda 5 myńnan astam adamnyń, Atyraý qalasynda 3 myńnan astam adamnyń qatysýymen ulttyq kıim sherýi, Kókshetaý qalasynda 1 600 áıel qatysqan kımeshekter sherýi (Qazaqstannyń Gınnes rekordtar kitabyna endi) ótti. Bul kórsetkish ótken jylmen salystyrǵanda 10 ese óskenin kórsetti. Mınıstrlik múddeli memlekettik organdarmen birlesip qoǵamda, sonyń ishinde jastar arasynda ulttyq kıim kııý úrdisin kúndelikti ádet pen qalypqa aınaldyrý baǵytynda túrli sharalar qabyldap keledi, — dep tolyqtyrdy mınıstrdiń orynbasary.

Sondaı-aq mınıstrlik usynǵan málimetke súıensek, elimizdiń joǵary oqý oryndarynda ulttyq kıim kııý tájirıbesi tárbıelik is-sharalar arqyly dáriptelip jatyr.

— «Dástúrli kıim neni bildiredi?», «Qazaq ulttyq kıimi: shyǵý tegi men bolashaǵy» sekildi kýratorlyq saǵat ótkiziledi. «Ulttyq kıim kúni» jáne «Naýryz» merekesi aıasynda «Ulttyq kıim — ulttyń kórinisi», «Ethno Kun», «Baıan sulý men Qozy Kórpesh» baıqaýlary, «Úzdik ulttyq kıim» konkýrstary, «Ulttyq kıim — ulttyń kórinisi» kórmeleri jáne «Nauryz Fest» festıvalderi uıymdastyrylady. Sol sııaqty mektepke deıingi jáne orta bilim berý uıymdarynda «Birtutas tárbıe baǵdarlamasy» júzege asyrylyp jatyr. Baǵdarlamada bul salanyń barlyq damý baǵyttary qamtylǵan, onyń ishinde ulttyq kıimdi kııý tájirıbesin engizý jáne nasıhattaý is-sharalary qarastyrylǵan, — delingen jaýapta.

Aıta ketsek, bıyl Býrabaıda ótken ulttyq quryltaıda Memleket basshysy Qasym-Jomart Toqaev bolmysymyzdyń mańyzdy kórinisi ulttyq kıimdi jan-jaqty dáripteý kerektigin aıtqan edi. 

— Bet-júzdi tumshalaıtyn qara kıimnen góri ózimizdiń ulttyq kıimderimiz áldeqaıda artyq, — dedi Prezıdent. 

Eske salaıyq, elimizde Ulystyń uly kúni áz Naýryzdy toılaý aıasynda 18 naýryz «Ulttyq kıim» kúni bolyp belgilengen. Osy oraıda Kazinform tilshisi qazaq mádenıetiniń mańyzdy jáne ajyramas atrıbýty ispettes ulttyq kıimderge taldaý jasaǵan edi.