Ulttyq kıim men áshekeı satyp almaq bolyp aldanǵan aqtóbelikter kásipkerdi qamaýǵa alýdy surady
AQTÓBE. KAZINFORM – Qazir kúdikti úıqamaqta otyr. Al aldanǵan aqtóbelikter aqshasyn daýlap, tergeý sotyna bardy.
Aldanǵan aqtóbelikter polıtsııaǵa shaǵym túsirip, Qylmystyq kodekstiń «Alaıaqtyq» baby boıynsha is qozǵaldy. Alǵashynda 8 adamnyń ózi 72 mln teńgesinen aıyrylǵany týraly aıtyldy. Alaıda jábirlenýshi sany odan da kóp. Keıbiri óziniń aldanǵanyn, aqshasynan aıyrylǵanyn ashyq aıta almaı otyr. Olar Aqtóbe oblystyq sot ǵımaratyndaǵy tergeý sotyna baryp, kásipkerdi qamaýǵa alýdy surady.
- Biz Aqtóbe oblystyq mamandandyrylǵan tergeý sotynan shyqtyq. Birinshi tergeý sotynyń qaýlysyna kelispeı «Bórte» dúkeniniń ıesi, kúdiktini qamaýǵa alýdy surap otyrmyz. Alaıda Aqtóbe oblystyq mamandandyrylǵan tergeý soty da prokýrordyń, jábirlenýshi taraptyń ótinishin qanaǵattandyrmady. Qaýlyǵa kelispeımiz. Sebebi aldanǵandar arasynda múgedektigi bar adamdar, kópbalalar analar, nesıe alǵan adamdar bar,- dedi qorǵaýshy.
Jábirlenýshiler tergeý jumystary kezinde de kúdiktini qamaýǵa alýdy surap otyr.
- Dúkenniń áleýmettik jelidegi paraqshasynan «ınvestıtsııa salý arqyly syılyq alýǵa bolady» degen jarnama shyqty. Sol kezde keńsege bardym. Olar kúmisten jasalǵan áshekeı buıymdaryn satpaıdy. Tek belgili bar somada ınvestıtsııa salyp, úsh nemese alty aıdan keıin syılyqqa beredi. Dál solaı kóp adam aldandy. Ózim shyǵyndy aıtqym kelmeıdi. Aldanǵanymyzdy bilgen soń bir-birimizdi áleýmettik jeli arqyly taýyp, ortaq chat qurdyq. Onda 125 adam otyr. Eń kóbi 150 mln teńgesinen aıyrylǵan. Eń tómeni 1-2 mln teńge bolady. Jalpy shyǵynymyz 3 mlrd teńgege jýyqtaıdy. Bizdiń talabymyz – qamaýǵa alynsyn, aqshamyzdy qaıtarsyn. Bul bir adam emes, uıymdasqan qylmystyq top. Onyń janynda inisi men kelini, sińlisi, apasy, qyzy bar. Olardyń bárine aqsha aýdaryldy,- dedi jábirlenýshi Gúlzat Bógebaıqyzy.
Al Almıra Tájiǵarına bolsa alǵashynda tek kúmisten jasalǵan áshekeı buıymdaryn satyp almaq boldy. Alǵashynda 500 myń teńge aparyp, úsh aıdyń ishinde aqshasyn aldy, kúmis buıymdary syılyqqa berildi. Bul eki jyl buryn bolǵan oqıǵa. Bıyl taǵy 500 myń teńge salyp, ulttyq naqyshtaǵy eki kıimdi jáne aqshasyn qaıtardy.
- Keshegide 2 000 000 teńge aqsha saldym. Odan keıin hat ta, habar da joq. Telefonyna habarlasqanda kótermedi. ıAǵnı alǵashynda adamdardy aldap, keıin qaıtarmaıtyn bolyp tur. Qazir dúkeninde zat ta joq. Eń bolmasa taýaryn alaıyn dep edim. Ol aqshany 9-maýsymǵa deıin qaıtaramyn degen edi. Investıtsııalyq dúken, qazirgi zaman talaby degen soń sendim,- dedi ol. Almıra Tájiǵarınanyń aıtýynsha, kásipker adamdarǵa aqsha alǵany týraly qolhat bergen. Onda jeke kýálik jáne JSN nómirin jazyp, mór basqan.
Bizge ınvestıtsııa salasyzdar dep aıtty. Al qolhatta «qaryzǵa aqsha aldym» dep jazylǵan. Aramyzda nesıe alyp, aqsha salǵandar bar. Sonda nesıe alyp, ony qaryzǵa bergenimiz be? Bizdi aldaǵan,- dedi jábirlenýshi Gúlzat Bógebaıqyzy.
Qazir tergeý jalǵasyp jatyr. Polıtsııa taǵy da aldanǵan adamdar bolsa Aqtóbe qalasy polıtsııa basqarmasyna, ıaǵnı, Sáńkibaı batyr dańǵyly 24R mekenjaıy kelip, aryz jazýdy surady.
