Ulttyq kıim kúni: Óskemende 3D tehnologııada ulttyq kıimder úlgisi kórsetildi
ÓSKEMEN. KAZINFORM - «Oıýlar sóıleıdi» atty festıval ótti. Óskemen qalasynda 18 naýryz – Ulttyq kıim kúnine oraı «Oıýlar sóıleıdi» atty festıval-jármeńke ótti.
O.Bókeı atyndaǵy qalalyq kitaphanada uıymdastyrylǵan «Oıýlar sóıleıdi» festıval-jármeńkesinde qolóner sheberleri kórmesi, ulttyq shapandar defılesi kórsetildi. Sondaı-aq ulttyq ydys-aıaqtar jáne «Syrmaqtar syry» kórmeleri qoıyldy.
Festıval Naýryz meıramynyń qazaq halqyna qalaı qaıta oralǵany jaıly derekti fılmnen bastaldy. Odan keıin ónerpazdar ánnen shashý shashyp, dombyrany kúmbirletip kúı tartty. Jármeńkege qoıylǵan ulttyq kıimder men túrli qolóner buıymdaryn nıet bildirgender satyp alyp jatty. Kıim-keshekti Shyǵys Qazaqstan oblystyq «Jan ana» qoǵamdyq birlestigi tigip ákelgen.
«Jýannyń jińishkerin, jińishkeniń úziler shaǵynda kelip jetken áz Naýryz meıramyn bıyl jańasha atap ótýdemiz. Ár kúnniń óz taqyryby, óz mazmuny bar. Búgingi Ulttyq kıim kúni halqymyzdyń kóneden kele jatqan kıimin ulyqtap, óskeleń urpaqqa nasıhattaý úshin qajet. Festıval-jármeńkege óz qolymen tikken kıimderin usynǵan – birlestigimizdiń múshesi, kópbalaly ana Gúlbaram Kóksegenova. Osyndaı ıgi maqsattaǵy sharalarǵa qatysýǵa árkez daıynbyz», - deıdi «Jan ana» qoǵamdyq birlestiginiń tóraǵasy Gúljamal Bershimbekova.
Budan bólek, festıvalde 3D tehnologııada ulttyq kıimder úlgisi kórsetildi. Jınalǵan jurtshylyq arasynda da án shyrqap, óleń oqyp, eldi meırammen quttyqtap, aqjarma tilekterin aqtarǵandar boldy.
